By អន្តរជាតិ ៖ សហព័ន្ធកីឡាបាល់ទាត់ពិភពលោក ហៅកាត់ថា FIFA កំពុងតែប្រឈមមុខនឹងសំណួរថ្មីអំពីការប្រកួតព្រឹត្តិការណ៍ World Cup ឆ្នាំ២០២៦ ជាមួយនឹងបញ្ហាវត្តមានក្រុមជម្រើសជាតិអ៊ីរ៉ង់ ដ្បិតប្រទេសមួយនេះមានជម្លោះជាមួយសហរដ្ឋអាមេរិក ដែលជាប្រទេសសហម្ចាស់ផ្ទះព្រឹត្តិការណ៍នៅឆ្នាំក្រោយ។
របាយការណ៍មួយចេញផ្សាយដោយកាសែតចក្រភពអង់គ្លេស The Guardian កាលពីថ្ងៃទី២៣ ខែមិថុនា ឆ្នាំ២០២៥ បានឱ្យដឹងថា មិនមានបទប្បញ្ញត្តិណាមួយនៅក្នុងបទប្បញ្ញត្តិរបស់ FIFA ក្នុងការរារាំងក្រុមជម្រើសជាតិអ៊ីរ៉ង់ពីការប្រកួតនៅសហរដ្ឋអាមេរិកនោះទេ បើទោះបីជាប្រទេសនេះ រងនូវសកម្មភាពពីយោធារដ្ឋបាលប្រធានាធិបតី លោក ដូណាល់ ត្រាំ (Donald Trump) ព្រមទាំងពលរដ្ឋអ៊ីរ៉ង់ស្ថិតក្រោមបម្រាមមិនឱ្យចូលទឹកដីអាមេរិកយ៉ាងណាក៏ដោយ។ ការហាមប្រាមនេះមានការលើកលែង ដែលអាចអនុវត្តចំពោះកីឡាករ បុគ្គលិក ឬក្រុមគ្រួសារពាក់ព័ន្ធជាមួយក្រុមជម្រើសជាតិក្នុងព្រឹត្តិការណ៍ FIFA World Cup ឆ្នាំ២០២៦។
ក្រុមជម្រើសជាតិអ៊ីរ៉ង់ ធ្លាប់ប៉ះក្រុមជម្រើសជាតិអាមេរិកក្នុងវគ្គចែកពូល World Cup ឆ្នាំ២០២២ នៅប្រទេសកាតា ដ្បិតអ៊ីរ៉ងបានបញ្ចប់ការប្រកួតវគ្គជម្រុះប្រចាំទ្វីបអាស៊ី ដោយបានកក់កៅអីព្រឹត្តិការណ៍ World Cup នៅឆ្នាំក្រោយរួចស្រេច និងជាលើកទី៤ជាប់ៗគ្នារបស់ពួកគេ។
ការប្រកួត World Cup ឆ្នាំ២០២៦ ប្រទេសកាណាដា និងម៉ិកស៊ិក គឺជាសហម្ចាស់រួមជាមួយអាមេរិក ដូច្នេះប្រសិនបើចង់បញ្ជៀសភាពតានតឹងខ្លាំងអំឡុងការប្រកួតនោះ មានតែនៅក្នុងពូល A ប៉ុណ្ណោះដែលអាចឱ្យអ៊ីរ៉ង់ជៀសវាងការប្រកួតទល់នឹងអាមេរិក ជាមួយនឹងការប្រកួតរបស់ពួកគេធ្វើឡើងនៅទឹកដីម៉ិកស៊ិក។ ជាបន្តបន្ទាប់ បើអ៊ីរ៉ង់ឆ្លងផុតវគ្គចែកពូល ពួកគេនឹងអាចបន្តប្រកួតលើទឹកដីម៉ិកស៊ិក សម្រាប់ការប្រកួតវគ្គ៣២ និង១៦ក្រុមចុងក្រោយ។ ដរាបណាពួកគេឡើងវគ្គបន្តបន្ទាប់ទៀត នោះពួកគេនឹងត្រូវប្រកួតនៅទឹកដីអាមេរិក ព្រោះចាប់ពីវគ្គ៨ក្រុម ដល់វគ្គផ្តាច់ព្រ័ត្រត្រូវធ្វើឡើងនៅទឹកដីអាមេរិក។
FIFA កាលពីថ្ងៃទី២៣ ខែមិថុនា ឆ្នាំ២០២៥ មិនបានឆ្លើយតបចំពោះសំណើសុំការអត្ថាធិប្បាយពីកាសែត The Guardian ជុំវិញវត្តមានអ៊ីរ៉ង់នៅ World Cup ឆ្នាំ២០២៦ នៅឡើយទេ ហើយក្បាលម៉ាស៊ីនបាល់ទាត់ពិភពលោកទំនងនឹងកំពុងពិចារណាលើជម្រើសរបស់ខ្លួនឱ្យបានមុនការប្រកួត World Cup ឆ្នាំក្រោយ ដែលនឹងចាប់ផ្តើមពីថ្ងៃទី១១ ខែមិថុនា ដល់ថ្ងៃទី១៩ ខែកក្កដា ហើយការសម្រេចរបស់ FIFA អាចធ្វើឡើងមុនបំណាច់ឆ្នាំ២០២៥។
ការសម្រេចចិត្តនេះ នឹងក្លាយជាការសម្រេចដ៏លំបាកមួយសម្រាប់ប្រធាន FIFA លោក Gianni Infantino ដែលបានភ្ជាប់ខ្លួនរបស់គាត់យ៉ាងជិតស្និទ្ធជាមួយលោក ត្រាំ ដែលជាអ្នកអនុញ្ញាតឱ្យមានការប្រើប្រាស់គ្រាប់បែកអាមេរិកទម្លាក់លើទីតាំងនុយក្លេអ៊ែរអ៊ីរ៉ង់ កាលពីចុងសប្តាហ៍មុន។ លោក Infantino និងក្រុមប្រឹក្សា FIFA នឹងមានការពិភាក្សាចុងក្រោយមួយស្តីពីការរៀបចំ ប៉ុន្តែគណៈកម្មាធិការរៀបចំការប្រកួតរបស់ FIFA ត្រូវបានគេរំពឹងថានឹងមានការបញ្ចូលបន្ថែមទៀតសម្រាប់ដំណើរការប្រកួត។ គណៈកម្មាធិការនេះក៏មានសមាជិកមកពីប្រទេសកាណាដា ម៉ិកស៊ិក និងអ៊ីរ៉ង់ ព្រមទាំងលោក Aleksander Ceferin ដែលជាប្រធានសហព័ន្ធបាល់ទាត់ទ្វីបអឺរ៉ុប (UEFA) ផងដែរ។
នៅឆ្នាំ២០២២ UEFA ធ្លាប់បានប្រកាសថា អ៊ុយក្រែន និងបេឡារុសនឹងត្រូវប្រកួតដាច់ដោយឡែកពីគ្នា អំឡុងការប្រកួតជម្រុះទ្វីបអឺរ៉ុប បន្ទាប់ពីការឈ្លានពានរបស់រុស្ស៊ីលើអ៊ុយក្រែន ហើយសកម្មភាពរបស់ប្រធានា UEFA អាចជាឧទាហរណ៍ល្អមួយសម្រាប់ FIFA អនុវត្តតាមនៅព្រឹត្តិការណ៍ឆ្នាំ២០២៦៕ ប្រភព ៖ The Guardian
