By រាជធានីភ្នំពេញ ៖ ក្រោយមានការតវ៉ាយ៉ាងខ្លាំងជុំវិញលទ្ធផលការប្រកួតវគ្គផ្ដាច់ព្រ័ត្រដណ្ដើមខ្សែក្រវាត់ IPCC Kun Khmer ក្នុងប្រភេទទម្ងន់៦០គីឡូក្រាមនៅលើសង្វៀនថោន កាលពីថ្ងៃទី២២ ខែមិថុនា ឆ្នាំ២០២៥រវាងកីឡាករសែន ចាន់រិទ្ធីស័ក ហៅ Alex មកពីក្លិបខ្លារខិនមានរិទ្ធ និងកីឡាករប៉ែន កាក់ រាជសីហ៍ មកពីក្លិបសេន ប៊ុនថេន ប៉ែនកាក់គុនខ្មែរកាលពីថ្ងៃទី២៣ ខែមិថុនា ឆ្នាំ២០២៥ កន្លងទៅនេះ សហព័ន្ធកីឡាប្រដាល់គុនខ្មែរ បានកោះហៅភាគីពាក់ព័ន្ធមាន គណៈកម្មការបច្ចេកទេស និងតំណាងក្លិបប្រដាល់ទាំងពីរមានលោកស៊ុន រីគី ប្រធានក្លិបខ្លារខិនមានរិទ្ធ និងលោកសេន ប៊ុនថេន ប្រធានក្លិបសេនប៊ុនថេនប៉ែនកាក់គុនខ្មែរ មកដោះស្រាយបញ្ចប់ជម្លោះតវ៉ា
លទ្ធផលប្រកួតដែលចៅក្រមប្រដាល់បានកាត់ក្ដីឱ្យកីឡាករប៉ែនកាក់ រាជសីហ៍ ឈ្នះក្នុងលទ្ធ
ផល៤-១។ គួររំលឹកថា ផ្ទុះការតវ៉ាផ្អើលទៀតហើយជុំវិញលទ្ធផលការប្រកួតវគ្គផ្ដាច់ព្រ័ត្រដណ្ដើមខ្សែក្រវាត់IPCC
ក្នុងការដោះស្រាយវិវាទលទ្ធផលការប្រកួតនោះ ឯកឧត្តមខូវ ឆាយ ប្រធានសហព័ន្ធកីឡាប្រដាល់គុនខ្មែរ បានឱ្យភាគីពាក់ព័ន្ធទាំងអស់មើលការប្រកួតឡើងវិញតាមរយៈការចាក់វីដែអូប្រកួតសាឡើងវិញនៅទីស្នាក់ការសហព័ន្ធកីឡាប្រដាល់គុនខ្មែរដែលមានទីតាំងស្ថិតនៅក្នុងបរិវេណពហុកីឡដ្ឋានជាតិអូឡាំពិក ដើម្បីឱ្យអស់ចិត្តទាំងអស់គ្នា។ ក្រោយពីបានមើលការប្រកួតយ៉ាងយកចិត្តទុកដាក់ឡើងវិញ ភាគីទាំងអស់ជាពិសេសតំណាងក្លិបខ្លារខិនមានរិទ្ធ និងតំណាងក្លិបសេនប៊ុនថេនប៉ែនកាក់គុនខ្មែរ បានស្រុះស្រួលគ្នាដើម្បីបញ្ចប់រឿងរៀងៗខ្លួន ។ បានន័យថា អ្នកឈ្នះនៅរក្សាតំណែងជាម្ចាស់ខ្សែក្រវាត់ដដែល។
ទោះបីជាយ៉ាងណា លោកស៊ុន រីគី ប្រធានក្លិបខ្លារខិនមានរិទ្ធបាននិយាយថា ក្រោយពីបានមើលវីដេអូរួចគណៈកម្មការនៅតែឱ្យសិស្សរបស់លោកចាញ់ដដែល លោកសុំបញ្ចប់រឿងគ្រប់យ៉ាងនៅត្រឹមនេះម៉ោងនេះ ។ ចំពោះលទ្ធផលលោកឈប់ដេញដោល និងសួរនាំទៀតទេ តែលទ្ធផលដែលឱ្យកូនសិស្សលោកចាញ់លោកមិនទទួលយកទេ។
សូមរំលឹកថា អាជ្ញាកណ្ដាលកាត់ក្ដីសម្រាប់ការប្រកួតរវាងកីឡាករសែន ចាន់រិទ្ធីស័ក និងកីឡាករប៉ែនកាក់ រាជសីហ៍ គឺលោកមាស សុជាតិ។ចំណែកចៅក្រមទាំង៥រូបមានលោកជួន សំណាង លោកសួង សុវណ្ណថា លោកលឹម វណ្ណដេត លោកផាត់ ឡេង និងកញ្ញាជួយ ចេមួយ។ សម្រាប់លោកអាជ្ញាកណ្ដាលឃឹម សុជាតិ ក៏ត្រូវមហាជនមួយចំនួនដែលមិនយល់ជេរលោកមិនតិចដែរថាលោកជាអាជ្ញាកណ្ដាលឆ្កួតលើកដៃបង្គោលខៀវ(ប៉ែនកាក់ រាជសីហ៍)ឈ្នះ ។ ប៉ុន្តែលោកបានតបវិញថា«មិនឱ្យលើកដៃបង្គោលខៀវយ៉ាងម៉េច បើគេឱ្យពិន្ទុមកអញ្ចឹងហើយ! បើមិនដូច្នោះទេត្រូវគេជេរលើសដើម និងត្រូវមួលកថែមទៀត»៕
