By យោងតាមការចុះផ្សាយរបស់ ក្រសួងព័ត៍មាន នាពីថ្ងៃទី ៣០ ខែមិថុនា ឆ្នាំ ២០២៥ នេះបានឱ្យដឹងថា កាលពីថ្ងៃទី២៨ ខែមិថុនា ឆ្នាំ២០២៥ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបគណៈប្រតិភូធុរកិច្ចម៉ាឡេស៊ី ដឹកនាំដោយ Dato’ Sri Dr. Ricky Yaw ប្រធានសមាគមធុរកិច្ចម៉ាឡេស៊ី-កម្ពុជា ដើម្បីពីភាក្សាអំពីឱកាសវិនិយោគ និងការពង្រឹងភាពជាដៃគូធុរកិច្ចរវាងប្រទេសទាំងពីរ។ គណៈប្រតិភូរួមមានតំណាងមកពីសមាគមធុរកិច្ចម៉ាឡេស៊ីចំនួ២០ ក្នុងវិស័យចម្រុះ ដូចជាសំណង់ គ្រឿងម៉ាស៊ីន គ្រឿងសង្ហារិម បច្ចេកវិទ្យា និងបរិក្ខារវេជ្ជសាស្ត្រ បដិសណ្ឋារកិច្ច និងវិស័យកម្មន្តសាលជាដើម។
នៅក្នុងជំនួបនេះ Dato’ Sri Dr. Ricky Yaw បានលើកឡើងថា៖ “គោលដៅនៃបេសកកម្មរបស់គណៈប្រតិភូគឺលើកទឹកចិត្តអ្នកវិនិយោគម៉ាឡេស៊ីឱ្យមកបណ្តាក់ទុននៅកម្ពុជា ហើយក៏អាចសម្របសម្រួលដល់សហគ្រាសកម្ពុជាក្នុងការស្វែងរកឱកាសនៅក្នុងប្រទេសម៉ាឡេស៊ី និងបង្កើតភាពជាដៃគូយុទ្ធសាស្ត្រជាមួយគ្នា។” លោកបានស្នើឱ្យក្រសួងជួយគាំទ្រដល់ការវិនិយោគរបស់ក្រុមហ៊ុនម៉ាឡេស៊ី ក្នុងការដោះស្រាយបញ្ហាលំបាកនានា ទាំងនៅពេលចាប់ផ្តើមបង្កើតក្រុមហ៊ុន និងក្នុងពេលដំណើរការអាជីវកម្ម។
ឯកឧត្តម ហែម វណ្ណឌី បានស្វាគមន៍ចំពោះចំណាប់អារម្មណ៍របស់គណៈប្រតិភូ និងបានបញ្ជាក់ការប្តេជ្ញាចិត្តរបស់កម្ពុជា ក្នុងការធានាស្ថិរភាព ការបង្កើតបរិយាកាសអំណោយផល និងគោលនយោបាយគាំទ្រការវិនិយោគ។ ឯកឧត្តមបានលើកឡើងថា៖ “ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ត្រៀមជួយគាំទ្រអ្នកវិនិយោគម៉ាឡេស៊ី ពិសេសទាក់ទងនឹងប្រកាសបង្កើតរោងចក្រ-សហគ្រាស ប្លង់បច្ចេកទេសរោងចក្រ និងស្តង់ដាសុវត្ថិភាពឧស្សាហកម្មជាដើម។ យើងក៏ប្រកាន់យកអភិក្រមបើកចំហ ដោយមិនមានការរឹតត្បិតការធ្វើស្វ័យប្រវត្តិកម្មខ្សែច្រវាក់ផលិតកម្ម និងការប្រើប្រាស់រូបូនៅក្នុងរោងចក្រទេ។”
ឯកឧត្តមរដ្ឋមន្ត្រីបានបន្ថែមថា គោលនយោបាយនេះឆ្លុះបញ្ចាំងពីមហិច្ឆតារបស់រាជរដ្ឋាភិបាលក្នុងការធ្វើទំនើបកម្មឧស្សាហកម្ម ដោយផ្តោតលើការបង្កើតតម្លៃបន្ថែមខ្ពស់។ ឯកឧត្តមក៏បានជម្រាបជូនគណៈប្រតិភូអំពីគោលនយោបាយបើកចំហសម្រាប់ការវិនិយោគ យន្តការលើកទឹកចិត្ត ការខិតខំអភិវឌ្ឍកម្លាំងពលកម្មជំនាញ និងគំនិតផ្តួចផ្តើមនានារបស់រាជរដ្ឋាភិបាល ដូចជាមូលនិធិអភិវឌ្ឍន៍ជំនាញជាដើម។ ក្រៅពីឧស្សាហកម្មវាយនភ័ណ្ឌ និងសំលៀកបំពាក់ ឯកឧត្តមរដ្ឋមន្ត្រី បានលើកទឹកចិត្តអ្នកវិនិយោគម៉ាឡេស៊ីឱ្យពិចារណាវិនិយោគលើវិស័យសក្តានុពល ដូចជាការកែច្នៃម្ហូបអាហារ បច្ចេកវិទ្យា ឧបករណ៍វេជ្ជសាស្ត្រ និងឧស្សាហកម្មគ្រឿងសង្ហារិម។
ឯកឧត្តមបានលើកឡើងថា៖ “ឧស្សាហកម្មគ្រឿងសង្ហារឹមក៏មានសក្តានុពលសំខាន់ ហើយយើងអាចស្វែងរកវិធីអភិវឌ្ឍផលិតផលពីឈើប្រកបដោយចីររភាព ដើម្បីគាំទ្រដល់ឧស្សាហកម្មគ្រឿងសង្ហារឹម។” ឯកឧត្តមរដ្ឋមន្ត្រីក៏បានស្នើឱ្យគណៈប្រតិភូសិក្សាឱកាសបង្កើតរោងចក្រនៅក្នុងតំបន់សេដ្ឋកិច្ចពិសេស ឬអាចពិចារណាបង្កើតតំបន់សេដ្ឋកិច្ចពិសេសម៉ាឡេស៊ីដោយឡែក ព្រមទាំងសហការជាមួយសហគ្រិនខ្មែរ ដើម្បីភ្ជាប់ទំនាក់ទំនងជាមួយធុរកិច្ចថ្មីក្នុងស្រុក។
ឯកឧត្តមបានបន្ថែមថា៖ “យើងមានធុរកិច្ចថ្មីជាច្រើនដែលអាចជាដៃគូដ៏ល្អសម្រាប់ការបណ្តាក់ទុនរបស់អ្នកវិនិយោគម៉ាឡេស៊ី។” ឯកឧត្តមបានបញ្ជាក់ជូនគណៈប្រតិភូអំពីទស្សនវិស័យកំណើនរបស់កម្ពុជាថា៖ “កម្ពុជាជាប្រទេសដែលមានភាពស្វាហាប់ មានសន្តិភាព ស្ថិរភាព និងប្តេជ្ញាអភិវឌ្ឍសេដ្ឋកិច្ច។ អ្នកត្រូវមានទំនុកចិត្ត មានជំនឿ និងក្តីសង្ឃឹមថា អាជីវកម្មរបស់អ្នកនឹងមានអនាគត និងឱកាសរីកចម្រើននៅទីនេះ។” ឯកឧត្តមក៏បានណែនាំឱ្យអ្នកវិនិយោគទាំងអស់ប្រើប្រាស់បណ្តាញវិនិយោគផ្លូវការ តាមរយៈក្រសួង-ស្ថាប័នរបស់រាជរដ្ឋាភិបាល ជាជាងការពឹងផ្អែកលើបណ្តាញក្រៅផ្លូវការ៕
ប្រភព៖ ក្រសួងព័ត៍មាន
