By យោងតាមាករចុះផ្សាយរបស់ ក្រសួងព័ត៌មាន នៅថ្ងៃទី ២៧ ខែមិថុនា ឆ្នាំ ២០២៥ នេះ បានឱ្យដឹងថា សម្ដេចតេជោ ហ៊ុន សែន ស្នើរដ្ឋមន្ដ្រីក្រសួងយុត្ដិធម៌សិក្សាលើលទ្ធភាពនៃការធ្វើវិសោធនកម្មរដ្ឋធម្មនុញ្ញដកសញ្ជាតិពលរដ្ឋកម្ពុជាដែល ឃុបឃិតជាមួយបរទេសមកបំផ្លាញជាតិរបស់ខ្លួន។
សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃ ព្រះរាជាណាចក្រកម្ពុជាបានស្នើដល់រដ្ឋមន្ដ្រីក្រសួងយុត្ដិធម៌ឱ្យសិក្សា លើលទ្ធភាពនៃការធ្វើវិសោធនកម្មរដ្ឋធម្មនុញ្ញដកសញ្ជាតិពលរដ្ឋកម្ពុជា ណាដែលឃុបឃិតជាមួយបរទេសមកបំផ្លាញជាតិរបស់ខ្លួន។
ក្នុងឱកាសអញ្ជើញជួប សំណេះសំណាល ជាមួយសមាជិកក្រុម ប្រឹក្សាឃុំ-សង្កាត់ ស្រុក-ក្រុង ខេត្តព្រះវិហារចំនួន ៤៤៦នាក់ នៅសាលាខេត្តព្រះវិហារ នាព្រឹកថ្ងៃទី ២៧ ខែមិថុនា ឆ្នាំ ២០២៥ សម្ដេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានលើកឡើងនូវចំណុចនេះ។សម្ដេចតេជោបន្តថា សម្ដេចមិនចង់លើកពីបញ្ហាជាតិសាសន៍ឯង ខណៈកំពុងមានបញ្ហាជាមួយបរទេស នោះទេ ប៉ុន្ដែមានពលរដ្ឋខ្មែរខ្លះប្រឆាំងជ្រុលពេកមិនគិតផល ប្រយោជន៍ជាតិ ។
សម្ដេចតេជោបានរំលឹកលើចំណុចពាក់ព័ន្ធថា កម្ពុជាបានផ្ញើលិខិតទៅតុលាការអន្តរជាតិរួចហើយ ប៉ុន្ដែបែរជាមានបងប្អូនប្រឆាំងមួយ ចំនួនបានទាមទារឱ្យបង្ហាញការបោះត្រា ឬការបញ្ជាក់អ្វីជាដើម។ សម្ដេចបន្តថា បងប្អូនប្រឆាំងក៏ប្រឆាំងទៅចុះ ប៉ុន្ដែកុំជ្រុលនិយមពេក។ តុលាការគេមាននីតិវិធីរបស់តុលាការ មិនអាចយកពាក្យបណ្ដឹងណាមួយ ទៅបង្ហាញមុនពេលកាត់ក្ដីទេ មិនថា តុលាការជាតិ ឬអន្តរជាតិ ពីព្រោះបើយើងធ្វើមិនស្រួល តុលាការមានសិទ្ធិព្យួរបណ្ដឹងរបស់កម្ពុជាបាន។
សម្ដេចតេជោ បានចោទជាសំណួរទៅកាន់ពួកប្រឆាំងថា តើអ្នកនៅជាមួយជាតិ ឬអ្នកនៅជាមួយអ្នកផ្សេង? ខណៈពេលនេះម៉ោងនេះ កម្ពុជា កំពុងតែមានក្តីក្តាំងជាមួយសត្រូវ ហេតុអ្វីពួកអ្នកទាមទារឱ្យរាជរដ្ឋាភិបាលបង្ហាញភស្តុតាងលើសំណុំរឿងកម្ពុជា ប្តឹងទៅកាន់តុលាការឡាអេ រឿងតំបន់មុំបី ប្រាសាទតាមាន់ តាមាន់តូច និងតាក្របីនោះ? រឿងនេះ គឺជារឿងសម្ងាត់របស់តុលាការ ។ដូច្នេះរាជរដ្ឋាភិបាល មិនតម្រូវតាមក្រុមប្រឆាំងទាំងនោះ ដើម្បីឱ្យខូចផលប្រយោជន៍ជាតិទាំងមូលនោះឡើយ ។
ភ្ជាប់ជាមួយការពន្យល់នេះសម្ដេចតេជោ ហ៊ុន សែន បានលើកឡើងដោយស្នើទៅរដ្ឋមន្រ្ដីក្រសួងយុត្តិធម៌ សូមពិនិត្យមើលការស្នើសុំធ្វើវិសោធនកម្មច្បាប់រដ្ឋធម្មនុញ្ញ ទាក់ទងនឹងការដកសញ្ជាតិពលរដ្ឋកម្ពុជាណា ដែលឃុបឃិតជាមួយបរទេសបំផ្លាញខ្មែរ ប្រឆាំងខ្មែរក្នុងកាលៈទេសៈវិវាទព្រំដែនជាមួយថៃ៕
ប្រភព៖ ក្រសួងព័ត៌មាន
