By ចក្រភពអង់គ្លេស ៖ កីឡាការិនីវាយតេន្នីសលំដាប់លេខ១ពិភពលោក សញ្ជាតិបេឡារុស Aryna Sabalenka ចាប់ផ្តើមការប្រកួតព្រឹត្តិការណ៍ Wimbledon ឆ្នាំ២០២៥ ដោយបានយកឈ្នះកីឡាការិនីសញ្ជាតិអាមេរិក ដើមកំណើតកាណាដា Carson Branstine នៅក្នុងការប្រកួតជម្រុះជុំទី១ ដោយលទ្ធផល ២សិតទល់នឹង០ (៦-១ និង ៧-៥) កាលពីថ្ងៃទី៣០ ខែមិថុនា ឆ្នាំ២០២៥ កន្លងទៅ។ ប៉ុន្តែការប្រកួតនោះ បណ្តាសារព័ត៌មាន និងបណ្តាញសង្គមនៅជុំវិញពិភពលោកបានផ្តោតខ្លាំងលើកីឡាការិនី Carson Branstine ដែលជាអត្តពលិកផង និងជាតារាម៉ូដែលផង។
កញ្ញា Carson Branstine វ័យ២៤ឆ្នាំ ដែលក្លាយជាកីឡាការិនីតេន្នីសអាជីពលើកដំបូងក្នុងឆ្នាំ២០១៤ បរាជ័យក្រោមថ្វីដៃកីឡាការិនី Aryna Sabalenka ម្ចាស់ជើងឯកពានរង្វាន់ Grand Slam ឯកត្តជន៣សម័យកាល គឺជាការបង្ហាញខ្លួនលើកដំបូងរបស់នាងនៅក្នុងព្រឹត្តិការណ៍កម្រិតពិភពលោក Wimbledon។
បើទោះបីជាបរាជ័យការប្រកួតនេះ ឈ្មោះ Carson Branstine បានលេចឡើងនៅលើប្រព័ន្ធផ្សព្វផ្សាយធំៗ និងបណ្តាញសង្គមនៅជុំវិញពិភពលោក ដោយសាររូបសម្រស់ដ៏ស្រស់សោភារបស់នាង រហូតមានមតិជាច្រើនលើកឡើងថា កីឡាតេន្នីសរកឃើញកីឡាការិនីដ៏ស្រស់ស្អាតថ្មីម្នាក់ទៀតហើយ។ សូម្បីកីឡាការិនីលំដាប់កំពូល Sabalenka វ័យ២៧ឆ្នាំ ក៏បានលាន់មាត់សរសើរពីសម្រស់របស់ Branstine ផងដែរ ដោយនាងនិយាយក្រោយការប្រកួតដូច្នេះថា «ខ្ញុំដឹងថានាងពិតស្រស់ស្អាតខ្លាំងណាស់។ នៅថ្ងៃមុនខ្ញុំបានបើកបណ្តាញសង្គម ហើយនាងកំពុងតែផ្តល់បទសម្ភាសន៍។ ខ្ញុំគិតថានាងមានលក្ខណៈសម្បត្តិគ្រប់គ្រាន់ ហើយខ្ញុំក៏គិតក្នុងចិត្តថា ឱព្រះជាម្ចាស់អើយ ក្មេងស្រីម្នាក់នេះស្អាតខ្លាំងណាស់។ បន្ទាប់មកខ្ញុំបានបើកមើលការចាប់ឆ្នោតគូប្រកួត ហើយស្រាប់តែខ្ញុំឃើញខ្ញុំត្រូវប្រកួតជាមួយក្មេងស្រីកាណាដាម្នាក់ (Branstine)។ ខ្ញុំបានបើកមើលប្រវត្តិរូបរបស់នាង ហើយខ្ញុំក៏គិតក្នុងចិត្តថា អូ៎ នេះជាស្រីស្អាត។ នោះហើយជាអ្វីដែលខ្ញុំគិតរហូតមកដល់ពេលនេះ»។
កីឡាការិនីជនជាតិកាណាដា Branstine បច្ចុប្បន្នកំពុងនៅជាប់ចំណាត់ថ្នាក់ពិភពលោកលេខ ១៩៤ ពិភពលោក ហើយកំពុងខំប្រឹងដើម្បីស្វែងរកផ្លូវនៅក្នុងអាជីពតេន្នីសកម្រិតខ្ពស់របស់នាង។
Branstine ទទួលបានការចាប់អារម្មណ៍អំឡុងពេលអាជីពកីឡាតេន្នីសនៅមហាវិទ្យាល័យ Texas A&M ហើយអាជីពកីឡានាងក៏ទទួលបានការចាប់អារម្មណ៍តាមរយៈអាជីពជាតារាម៉ូដែល ដែលបានទាក់ទាញចំណាប់អារម្មណ៍សាធារណជនយ៉ាងខ្លាំង។ មិនតែប៉ុណ្ណោះ នាងបានបំពេញការងារជាតារាម៉ូដែល ដើម្បីបំពេញមហិច្ឆតាលើអាជីពកីឡាតេន្នីសរបស់នាង។
នៅក្នុងបទសម្ភាសន៍មួយ Branstine នាមលើកឡើងអំពីការងារជាតារាម៉ូដែលបង្កើតប្រាក់ចំណូល ដើម្បីបំពេញដល់អាជីពកីឡាតេន្នីសរបស់នាងដោយនិយាយថា នាងមិនចង់សុំអ្វីពីឪពុកម្តាយនាងទេ។ ទោះជានាងនិយាយថា នាងស្រលាញ់អាជីពតារាបង្ហាញម៉ូដ និងបង្ហាញមុខនៅមុខកាមេរ៉ាក៏ដោយ ការដើរម៉ូដគឺជាហេតុផលដែលនាងអាចមានលទ្ធភាពធ្វើដំណើរទៅប្រកួតកីឡាតេន្នីសជុំវិញពិភពលោក។
បច្ចុប្បន្ន Branstine បានចុះហត្ថលេខាជាមួយភ្នាក់ងារម៉ូដែលចំនួន ២ និងចុះកុងត្រាជាមួយក្រុមហ៊ុនមួយចំនួន រួមទាំង Farah Kimia និង Trinity ផងដែរ។ នាងក៏ធ្លាប់ថ្លែងប្រាប់ទស្សនាវដ្តី Clay កាលពីខែមុនហើយ អំពីការស្រឡាញ់អាជីពតារាម៉ូដែល និងកីឡាតេន្នីសដូចគ្នា៕ ដកស្រង់ ៖ The Sun, Daily Mail និង New York Post
