By យោងតាមការចុះផ្សាយរបស់ ក្រសួងព័ត៌មាន នាថ្ងៃទី ១១ ខែកក្កដា ឆ្នាំ ២០២៥ នេះបានឱ្យដឹងថា ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងសប្ដាហ៍នេះបានដឹកនាំកិច្ចប្រជុំពិភាក្សា និងអញ្ជើញចុះត្រួតពិនិត្យបឹងធំ នៅក្នុងស្រុករលាប្អៀរ ស្រុកជលគិរី និងក្រុងកំពង់ឆ្នាំង ខេត្តកំពង់ឆ្នាំង។ក្នុងកិច្ចប្រជុំឯកឧត្តមឧបនាយករដ្ឋមន្រ្តីបានលើកឡើងថា ក្រសួងរៀបចំដែនដី នគរូបនីយកម្ម និងសំណង់ បានសាកល្បងកំណត់នូវប្លង់គោលនៃការប្រើប្រាស់ដីជូនឃុំទាំង១៣០នៅជុំវិញបឹងទន្លេសាប ហើយកិច្ចការងារនេះចាប់ផ្ដើមចេញពីខេត្តកំពង់ឆ្នាំង។
ឯកឧត្តមឧបនាយករដ្ឋមន្ត្រី សាយ សំអាល់ បានថ្លែងកាលពីថ្ងៃទី៩ ខែកក្កដាថា ការណ៍ដែលយើងជ្រើសរើសផ្ដើមចេញពីខេត្តកំពង់ឆ្នាំង ពីព្រោះខេត្តនេះបានបញ្ចប់ការវាស់វែងដីធ្លីរួចរាល់ ។ដូច្នេះអ្វីដែលយើងទទួលបានក្នុងដៃ គឺផែនទីសុរិយោដី ងាយស្រួលក្នុងការកំណត់នូវប្លង់គោលនៃការប្រើប្រាស់ដីក្នុងកម្រិតឃុំ ។ ម្យ៉ាងទៀត ខេត្តកំពង់ឆ្នាំងជាទីកន្លែងយុទ្ធសាស្ត្រសម្រាប់ចិញ្ចឹមត្រី មានសក្តានុពលច្រើនសម្រាប់វិស័យកសិកម្ម និងសេដ្ឋកិច្ច។
បើតាមការបញ្ជាក់របស់ឯកឧត្តមរដ្ឋមន្រ្តី គឺកិច្ចការដែលក្រសួងត្រូវធ្វើបន្ទាប់ពីបញ្ចប់ការងារវាស់វែងដីធ្លីរួច ត្រូវបន្តការងារសិក្សា និងផ្ដល់យោបល់អំពីគុណតម្លៃនៃសេដ្ឋកិច្ចរបស់ដីតាមសក្តានុពលនៃបណ្តាខេត្តនីមួយៗ ដើម្បីជួយលើកស្ទួយជីវភាពប្រជាពលរដ្ឋ, ជំរុញកិច្ចអភិវឌ្ឍន៍ និងពង្រឹងខឿនសេដ្ឋកិច្ចជាតិឱ្យកាន់តែរឹងមាំ ។
ក្រសួងរៀបចំដែនដី នគរូបនីយកម្ម និងសំណង់ បានបង្ហាញពីការសិក្សាមួយថា បឹងទន្លេសាបធនធានធម្មជាតិរបស់កម្ពុជា អាចផ្ដល់ប្រយោជន៍សេដ្ឋកិច្ចដល់កម្ពុជាគិតជាទំហំទឹកប្រាក់រាប់ពាន់លានដុល្លារតាមរយៈការផ្ដល់ជាផលត្រី និងទឹកសាបសម្រាប់ប្រើប្រាស់ក្នុងវិស័យកសិកម្ម ក៏ដូចជាផ្លូវសម្រាប់ដឹកជញ្ជូនតាមផ្លូវទឹកទៀតផង៕
ប្រភព៖ ក្រសួងព័ត៌មាន
