By រាជធានីភ្នំពេញ ៖ អាជ្ញាធរខណ្ឌ៧មករា បានដឹកនាំមន្ត្រីជំនាញពាក់ព័ន្ធ ចុះត្រួតពិនិត្យ ណែនាំ និងព្រមានឲ្យធ្វើកិច្ចសន្យា ក្រោយការដ្ឋានសំណង់មួយកន្លែងរបស់ភោជនីយដ្ឋាន«ថ្មដា» បានបណ្តុះសរសៃដែក រំលោភលើលំហផ្លូវសាធារណៈ ។
ប្រតិបត្តិការចុះត្រួតពិនិត្យ និងធ្វើកិច្ចសន្យានេះ បានធ្វើឡើងចំនួន០២លើក កាលពីរសៀលថ្ងៃទី០៩ និងព្រឹកថ្ងៃទី១០ ខែកក្កដា ឆ្នាំ២០២៥ ដោយមានការណែនាំពីលោក ថេង សុថុល អភិបាលខណ្ឌ៧មករា ចាត់ឲ្យលោក ណុប វណ្ណា នាយករងរដ្ឋបាល ដឹកនាំជំនាញពាក់ព័ន្ធ ប្រធានការិយាល័យរៀបចំដែនដីខណ្ឌ ចៅសង្កាត់ មេភូមិ និងមន្ត្រីជំនាញ ចុះផ្ទាល់ត្រួតពិនិត្យការដ្ឋាននោះ ។
ក្នុងការចុះត្រួតពិនិត្យនេះដែរ មន្ត្រីជំនាញបានពិនិត្យឃើញជាក់ស្តែង ដោយម្ចាស់សំណង់របស់ភោជនីយដ្ឋានថ្មដា បានបណ្តុះសរសៃដែកធ្នឹមមកលើលំហផ្លូវសាធារណៈ មានប្រវែងបណ្តោយ១៣ម៉ែត្រ និងទទឹង ១ម៉ែត្រ ៦តឹក ហើយម្ចាស់ការដ្ឋានបានសាងសង់ដោយគ្មានលិខិតអនុញ្ញាតសាងសង់ឡើយ ។
ជាមួយគ្នានោះ មន្ត្រីជំនាញ នៃការិយាល័យរៀបចំដែនដីខណ្ឌ៧មករា បានបញ្ជាក់ថា ក្រោយពិនិត្យឃើញការរំលោភ និងសាងសង់គ្មានលិខិតអនុញ្ញាតបែបនេះ មន្ត្រីជំនាញបានផ្អាកការសាងសង់ជាបណ្តោះអាសន្ន ដោយតម្រូវឲ្យម្ចាស់សំណង់ត្រូវសុំច្បាប់អនុញ្ញាតសាងសង់នៅសាលាខណ្ឌឲ្យបានត្រឹមត្រូវជាមុនសិន ។
ក្នុងនោះអាជ្ញាធរ ស្នើសុំឲ្យម្ចាស់សំណង់ត្រូវកាត់សរសៃដែក ដែលបណ្តុះចេញមករំលោភលំហផ្លូវសាធារណៈនេះចេញ ជាដាច់ខាត តែម្តង ។
អាជ្ញាធរ បានព្រមានថា ក្នុងករណីម្ចាស់ការដ្ឋានសំណង់របស់ភោជនីយដ្ឋាន«ថ្មដា» មិនអនុវត្តតាមការណែនាំ និងកិច្ចសន្យារបស់រដ្ឋបាលខណ្ឌ ហើយនៅតែបន្តសាងសង់ ឬជួសជុល នោះរដ្ឋបាលខណ្ឌ នឹងចាត់វិធានការរដ្ឋបាល។ រាល់ការខូចខាត ឬបាត់បង់សម្ភារៈ អាជ្ញាធរ នឹងមិនទទួលខុសត្រូវឡើយ ៕
