By (រាជធានីភ្នំពេញ)៖ តាមការចុះផ្សាយរបស់ ទូរទស្សន៍ជាតិកម្ពុជា ទទក បានឱ្យដឹងពី ប្រភេទប័ណ្ណ សម្រាប់ប្រើប្រាស់សេវាថែទាំសុខភាពដោយឥតគិតថ្លៃ។ ចំពោះប័ណ្ណ ៤ប្រភេទ មានប័ណ្ណសមាជិក ប.ស.ស. ប័ណ្ណមូលនិធិសមធម៌សុខាភិបាល , ប័ណ្ណសមធម៌ និង ប័ណ្ណអាទិភាពទទួលសេវាសុខភាពសាធារណៈ ដើម្បីទទួលបានសេវាថែទាំសុខភាពដោយឥតគិតថ្លៃ នៅតាមមណ្ឌលសុខភាព និងមន្ទីពេទ្យរដ្ឋ ទូទាំងប្រទេស។
ប័ណ្ណទាំង ៤ប្រភេទនោះ រួមមាន៖
១. ប័ណ្ណសមាជិក ប.ស.ស. ៖ ប័ណ្ណសមាជិក ប.ស.ស. ចេញដោយ បេឡាជាតិសន្តិសុខសង្គម។ អត្ថប្រយោជន៍នៃប័ណ្ណនេះ សម្រាប់ប្រើសេវាផ្នែកថែទាំសុខភាពឥតគិតថ្លៃនៅតាមមណ្ឌលសុខភាព និងមន្ទីពេទ្យរដ្ឋ និងឯកជនទូទាំងប្រទេសដែលជាដៃគូជាមួយ ប.ស.ស. ផ្នែកហានិភ័យការងារ ផ្នែកប្រាក់សោធន និងតាវកាលិកនានា។ រាល់បន្ទុកចំណាយជារបស់បេឡាជាតិសន្តិសុខសង្គម។
២. ប័ណ្ណមូលនិធិសមធម៌សុខាភិបាល ៖ ប័ណ្ណនេះមាន ២ប្រភេទ ទី១) សម្រាប់ ក្រុមប្រឹក្សាឃុំ-សង្កាត់-ស្រុក-ក្រុង-ខណ្ឌ-រាជធានី-ខេត្ត និងសម្រាប ទី២) សម្រាប់កម្មករនិតយោជិតក្រៅប្រព័ន្ធ។ ប័ណ្ណមូលនិធិសមធម៌សុខាភិបាលចេញដោយ បេឡាជាតិសន្តិសុខសង្គម ដែលមានអត្ថប្រយោជន៍ សម្រាប់ប្រើប្រាស់សេវាផ្នែកថែទាំសុខភាពឥតគិតថ្លៃនៅតាមមណ្ឌលសុខភាព និងមន្ទីពេទ្យរដ្ឋ ទូទាំងប្រទេស។ ប័ណ្ណនេះ បន្ទុកចំណាយដោយ រាជរដ្ឋាភិបាល។
៣. ប័ណ្ណសមធម៌ ៖ ប័ណ្ណសមធម៌ គឺសម្រាប់គ្រួសារក្រីក្រកម្រិត១ និងកម្រិត២ ចេញដោយក្រសួងផែនការ ដែលអាចប្រើសេវាថែទាំសុខភាពឥតគិតថ្លៃ នៅតាមមណ្ឌលសុខភាព និងមន្ទីពេទ្យរដ្ឋ ទូទាំងប្រទេស និងអត្ថប្រយោជន៍មិនមែនវេជ្ជសាស្ត្រ (ឧបត្ថម្ភសេវាសាហ៊ុយធ្វើដំណើរ ថ្លៃអាហារអ្នកជំងឺ និងវិភាគទានបុណ្យសព)។ បន្ទុកចំណាយដោយ រាជរដ្ឋាភិបាល។
៤. ប័ណ្ណអាទិភាពទទួលសេវាសុខភាពសាធារណៈ៖ ប័ណ្ណនេះ សម្រាប់អ្នកជំងឺសម្រាកនៅមន្ទីរពេទ្យរដ្ឋ (គ្រួសារក្រីក្រដែលគ្មានប័ណ្ណសមធម៌)។ ជាប្រភេទប័ណ្ណចេញដោយក្រសួងសុខាភិបាល ដើម្បីប្រើសេវាផ្នែកថែទាំសុខភាពឥតគិតថ្លៃ នៅតាមមណ្ឌលសុខភាព និងមន្ទីរពេទ្យរដ្ឋទូទាំងប្រទេស និងអត្ថប្រយោជន៍មិនមែនវេជ្ជសាស្ត្រ (ឧបត្ថម្ភសេវាសាហ៊ុយធ្វើដំណើរ ថ្លៃអាហារអ្នកជំងឺ និងវិភាគទានបុណ្យសព)។ បន្ទុកចំណាយដោយ រាជរដ្ឋាភិបាល៕
