By រាជធានីភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ បានប្រារព្ធពិធីបើកពិព័រណ៍ការងារ និងផលិតភាពជាតិ ឆ្នាំ២០២៥ ដ៏អធិកអធមកាលពីថ្ងៃទី១ ខែវិច្ឆិកា ឆ្នាំ២០២៥ នៅកោះពេជ្រ ដោយមានគោលបំណងសំខាន់ក្នុងការផ្ដល់ឱកាសការងារជូនដល់យុវជន សិស្សនិស្សិត និងបងប្អូនពលករដែលបានត្រឡប់មកពីប្រទេសថៃ។ ព្រឹត្តិការណ៍រយៈពេលពីរថ្ងៃ (១-២ ខែវិច្ឆិកា) នេះ នឹងក្លាយជាវេទិកាដ៏សំខាន់មួយក្នុងការស្វែងរកការងារដ៏មានសក្ដានុពល។
ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានគូសបញ្ជាក់ថា ការចូលរួមពីវិស័យឯកជននៅតែខ្លាំងក្លា ខណៈដែលសកម្មភាពសេដ្ឋកិច្ច និងសង្វាក់ផលិតកម្មនៅគ្រប់វិស័យដូចជា កសិកម្ម ឧស្សាហកម្ម ពាណិជ្ជកម្ម និងសេវាកម្ម កំពុងមានតម្រូវការកម្លាំងពលកម្មខ្ពស់។ ឯកឧត្ដមបានមានប្រសាសន៍ថា៖ «សិស្សនិស្សិតមិនត្រឹមតែបានមកស្វែងយល់អំពីក្រុមហ៊ុននានាដែលត្រូវជាមួយជំនាញ ឬមុខវិជ្ជារបស់ពួកគេប៉ុណ្ណោះទេ តែក៏ជាឱកាសដ៏ល្អក្នុងការស្វែងរកការងារផ្ទាល់តែម្ដង ប្រសិនបើមានការចុះសម្រុងគ្នារវាងក្រុមហ៊ុន និងបេក្ខជន នោះការសម្ភាសន៍នឹងធ្វើឡើងភ្លាមៗ»។
ពិព័រណ៍នេះប្រារព្ធឡើងក្រោមប្រធានបទ «វិថីឆ្ពោះទៅរកផលិតភាព៖ ផ្សារភ្ជាប់ជំនាញ បច្ចេកវិទ្យា និងឱកាសការងារ» ដែលមានគោលបំណងរក្សាតុល្យភាពទីផ្សារការងារ តាមរយៈការគាំទ្រនិយោជកក្នុងការជ្រើសរើសបុគ្គលិក និងជួយអ្នកស្វែងរកការងារឱ្យទទួលបានជោគជ័យ។ ឯកឧត្ដម ហេង សួរ ក៏បានបន្ថែមថា ព្រឹត្តិការណ៍នេះជាយន្តការដ៏សំខាន់ក្នុងការពង្រឹងទំនាក់ទំនងរវាងរាជរដ្ឋាភិបាល ដៃគូអភិវឌ្ឍន៍ និយោជក រោងចក្រ សហគ្រាស កម្មករនិយោជិត គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) សិស្សនិស្សិត យុវជន និងអ្នកស្វែងរក ការងារធ្វើ។ ព្រមទាំងឆ្លើយតបទៅនឹងតម្រូវការជំនាញក្នុងទីផ្សារការងារបច្ចុប្បន្ន និងអនាគត ព្រមទាំងលើកកម្ពស់ការយល់ដឹង និងបណ្ដុះផ្នត់គំនិតអំពីការបង្កើនផលិតភាពការងារ។
ពិព័រណ៍ការងារឆ្នាំនេះត្រូវបានបែងចែកជា ៣ព្រឹត្តិការណ៍សំខាន់ៗ៖
* **ទី១. ការតាំងបង្ហាញរបស់ក្រុមហ៊ុន សហគ្រាស៖** ផ្ដល់ឱកាសពិសេសសម្រាប់សិស្សនិស្សិត យុវជន និងអ្នកស្វែងរកការងារដាក់ពាក្យផ្ទាល់ ជួប និងសម្ភាសន៍ភ្លាមៗជាមួយនិយោជកដែលមានតម្រូវការកម្លាំងពលកម្មជាក់ស្ដែងជាង ៣ម៉ឺនកន្លែង។
* **ទី២. កិច្ចពិភាក្សាលើប្រធានបទ «វិថីឆ្ពោះទៅរកផលិតភាព៖ ផ្សារភ្ជាប់ជំនាញ បច្ចេកវិទ្យា និងឱកាសការងារ» និងការចែករំលែកបទពិសោធន៍៖** មានការចូលរួមពីវាគ្មិនកិត្តិយសដែលមានជំនាញក្នុងទីផ្សារដើម្បីចែករំលែកចំណេះដឹង បទពិសោធន៍ជោគជ័យ ក្នុងគោលបំណងបណ្ដុះផ្នត់គំនិត កែប្រែឥរិយាបថ និងបង្កើនការយល់ដឹងពីការលើកកម្ពស់ផលិតភាព និងភាពប្រកួតប្រជែងអាជីវកម្ម។
* **ទី៣. កម្មវិធីបង្កើតបណ្ដាញទំនាក់ទំនងផ្នែកធនធានមនុស្ស៖** បើកច្រកសម្រាប់សិស្សនិស្សិតស្វែងយល់ព័ត៌មានការងារ និងនិយោជកស្វែងរកបុគ្គលិកឱ្យជួបគ្នា។
លោក គង់ ច័ន្ទវាសនា អនុប្រធានសហភាពសហព័ន្ធយុវជនកម្ពុជា រាជធានីភ្នំពេញ បានថ្លែងថា នេះជាការចូលរួមផ្ទាល់លើកទី៣ និងជាឆ្នាំទី៦ហើយដែលសហភាពសហព័ន្ធយុវជនកម្ពុជា រាជធានីភ្នំពេញ បានសហការជាមួយទីភ្នាក់ងារជាតិមុខរបរ និងការងារ (NEA) នៃក្រសួងការងាររៀបចំកម្មវិធីនេះឡើង។ ការចូលរួមនេះរួមមាន ការដាក់តាំងបង្ហាញស្ដង់យុវជន ការជ្រើសរើសយុវជនចូលរួមសន្និសីទសារព័ត៌មាន កម្មវិធីប្រកួតនិយាយជាសាធារណៈ (វោហាកោសល្យ) សិក្ខាសាលា និងការផ្សព្វផ្សាយតាមបណ្ដាញសង្គមដើម្បីជំរុញការចូលរួមរបស់យុវជន។
លោក គង់ ច័ន្ទវាសនា បានបន្ថែមថា ពិព័រណ៍ការងារ និងផលិតភាពជាតិ ឆ្នាំ២០២៥ នេះពិតជាមានសារៈសំខាន់សម្រាប់យុវជន និងឆ្លុះបញ្ចាំងពីការយកចិត្តទុកដាក់ខ្ពស់ ការគិតគូរម៉ត់ចត់ និងចក្ខុវិស័យវែងឆ្ងាយរបស់ក្រសួងការងារ ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី។
ប្រធានបទនៃការបង្កើនផលិតភាពតាមរយៈការផ្សារភ្ជាប់ជំនាញ បច្ចេកវិទ្យា និងឱកាសការងារនេះ គឺឆ្លើយតបទៅនឹងការរីកចម្រើន និងការប្រែប្រួលយ៉ាងឆាប់រហ័សនៃបច្ចេកវិទ្យាក្នុងយុគសម័យបរិវត្តកម្មឌីជីថល (Digital Transformation) ដែលបច្ចេកវិទ្យាឌីជីថលបានក្លាយជាចំណែកដ៏សំខាន់ក្នុងជីវភាពរស់នៅប្រចាំថ្ងៃរបស់យើងទាំងអស់គ្នា។
ព្រឹត្តិការណ៍ដ៏មានសារៈសំខាន់នេះក៏មានការចូលរួមសហការពីដៃគូសំខាន់ៗរួមមាន ទីភ្នាក់ងារជាតិមុខរបរ និងការងារ (NEA), សហភាពសហព័ន្ធយុវជនកម្ពុជា (ស.ស.យ.ក.) រាជធានីភ្នំពេញ, សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC), មូលនិធិអភិវឌ្ឍន៍ជំនាញ (SDF), ទីភ្នាក់ងារសហប្រតិបត្តិការអន្តរជាតិកូរ៉េ (KOICA), និងអង្គការអន្តរជាតិខាងការងារ (ILO) ផងដែរ។
