By រាជធានីភ្នំពេញៈ កម្លាំងនគរបាលខណ្ឌទួលគោកបានធ្វើការឃាត់ខ្លួនជនសង្ស័យម្នាក់ភ្លាមៗ បន្ទាប់ពីធ្វើសកម្មភាពលួចម៉ូតូម៉ាក Suzuki Nex មួយគ្រឿងពីនិស្សិតម្នាក់នៅតាមដងផ្លូវសាធារណៈ។ ហេតុការណ៍នេះបានកើតឡើងនៅវេលារំលងអាធ្រាត្រ ថ្ងៃទី០២ ខែវិច្ឆិកា ឆ្នាំ២០២៥។
នគរបាលខណ្ឌទួលគោកបានឲ្យដឹងថា នៅវេលាម៉ោងប្រមាណ០១:៥០នាទីរំលងអាធ្រាត្រ កម្លាំងប៉ុស្តិ៍នគរបាលរដ្ឋបាលទឹកល្អក់ទី៣ បានធ្វើការឃាត់ខ្លួនជនសង្ស័យម្នាក់ឈ្មោះ កាន់ ចាន់វិច្ឆិកា ភេទប្រុស អាយុ៣៥ឆ្នាំ ជនជាតិខ្មែរ ពុំមានមុខរបរពិតប្រាកដ និងពុំមានទីលំនៅច្បាស់លាស់។ ជនសង្ស័យរូបនេះត្រូវបានរកឃើញថាមានសារធាតុញៀនក្នុងខ្លួនផងដែរ។
ករណីលួចនេះបានប្រព្រឹត្តទៅនៅចំណុចផ្លូវលេខ២៦៥ ក្រុមទី៣៥ ភូមិ១៣ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។
ជនរងគ្រោះក្នុងករណីនេះមានឈ្មោះ កន ពិសិទ្ធ ភេទប្រុស អាយុ២០ឆ្នាំ ជនជាតិខ្មែរ ជានិស្សិតឆ្នាំទី២ ស្នាក់នៅផ្ទះជួលគ្មានលេខ ផ្លូវលេខ២៦១ សង្កាត់បឹងសាឡាង ខណ្ឌទួលគោក។
ក្រោយការឃាត់ខ្លួន សមត្ថកិច្ចបានដកហូតវត្ថុតាងម៉ូតូ០១គ្រឿងម៉ាក Suzuki Nex ពណ៌ស ពាក់ផ្លាកលេខ កណ្ដាល 1Z-9418 ដែលជារបស់ជនរងគ្រោះ ហើយបានប្រគល់ជូនម្ចាស់វិញភ្លាមៗ។ បច្ចុប្បន្ន ជនសង្ស័យកំពុងត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីបន្តនីតិវិធីតាមច្បាប់។
