By នៅវេលាម៉ោង ៦ល្ងាច ថ្ងៃទី០១ ខែវិច្ឆិកា ឆ្នាំ២០២៥ នេះ កងទ័ពកម្ពុជា និងថៃ បានចាប់ផ្ដើមដំណាក់កាលទី១ នៃការដកអាវុធធុនធ្ងន់ចេញពីតំបន់ជម្លោះព្រំដែនប្រទេសទាំងពីរដំណាលគ្នា ដោយដឹកជញ្ជូនត្រឡប់ទៅកាន់មូលដ្ឋានដើមវិញ។ នេះបើយោងតាមការផ្សាយរបស់ទីភ្នាក់ងារសារព័ត៌មានកម្ពុជា AKP។
សកម្មភាពនៃការដកអាវុធធុនធ្ងន់ចេញពីតំបន់ព្រំដែនខាងលើនេះ ត្រូវបានធ្វើឡើងក្រោមការសង្កេតការណ៍ និងការផ្ទៀងផ្ទាត់យ៉ាងយកចិត្តទុកដាក់ពីសំណាក់ក្រុមអ្នកសង្កេតការណ៍អាស៊ាន (AOT) នៃប្រទេសទាំងពីរ ដើម្បីធានានូវតម្លាភាព និងសុវត្ថិភាព។
គួររម្លឹកផងដែរថា កម្ពុជា និងថៃ ក៏បានកែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់ជានិម្មិតរូប ចេញពីតំបន់ជម្លោះម្តងរួចមកហើយ កាលពីយប់ថ្ងៃទី២៦ ខែតុលា ឆ្នាំ២០២៥។ ការអនុវត្តនេះបង្ហាញពីបំណងប្រាថ្នាក្នុងការកសាងទំនុកចិត្ត និងរក្សាសន្តិភាពនៅតាមបណ្តោយព្រំដែនរវាងប្រទេសជិតខាងទាំងពីរ។
