ពលរដ្ឋខ្មែរ១៥នាក់ វិលចូលស្រុកប្រកបដោយសុវត្ថិភាព! សមត្ថកិច្ចខេត្តបន្ទាយមានជ័យ ចុះសម្របសម្រួលយ៉ាងយកចិត្តទុកដាក់

បន្ទាយមានជ័យ៖ ពលរដ្ឋខ្មែរចំនួន ១៥នាក់ បានវិលត្រឡប់មកពីប្រទេសថៃចូលមកកម្ពុជាវិញប្រកបដោយសុវត្ថិភាព តាមច្រកអន្តរជាតិដូង ខេត្តបាត់ដំបង នៅថ្ងៃទី០១ ខែវិច្ឆិកា ឆ្នាំ២០២៥។ ស្នងការដ្ឋាននគរបាលខេត្តបន្ទាយមានជ័យ បានប្រកាសពីការជួយសម្របសម្រួល និងដឹកជញ្ជូនពលរដ្ឋទាំងនោះទៅដល់លំនៅឋានរបស់ពួកគេយ៉ាងយកចិត្តទុកដាក់។

ការងារដ៏សំខាន់នេះ គឺបានធ្វើឡើងតាមបញ្ជាដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ។ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានចាត់តាំងលោកឧត្តមសេនីយ៍ត្រី យ៉ត សុផល ស្នងការរង ផែនការងារកិច្ចការប៉ុស្តិ៍ ដឹកនាំកម្លាំងនគរបាលចំនួន ១៥នាក់ សហការជាមួយរដ្ឋបាលខេត្ត និងស្ថាប័នពាក់ព័ន្ធ ចុះជួយសម្របសម្រួលដល់ការឆ្លងដែនរបស់បងប្អូនពលរដ្ឋខ្មែរដែលបានវិលត្រឡប់ពីប្រទេសថៃ។

ជាលទ្ធផល ក្នុងថ្ងៃដដែលនោះ ចាប់ពីម៉ោង ៨:០០ ព្រឹក ដល់ម៉ោង ៤:០០ ល្ងាច ពលរដ្ឋខ្មែរដែលបានវិលត្រឡប់មកវិញមានចំនួន ១៥នាក់ ក្នុងនោះមានស្រី ៧នាក់។ កម្លាំងនគរបាលបានប្រើប្រាស់រថយន្តចំនួន ២គ្រឿង ដើម្បីដឹកជញ្ជូនពលរដ្ឋទាំងនោះទៅកាន់ខេត្តគោលដៅរៀងៗខ្លួន។

ក្នុងចំណោមពលរដ្ឋទាំង ១៥នាក់ គឺមាន ៤នាក់ (ស្រី ១នាក់) ទៅកាន់ខេត្តបាត់ដំបង, ២នាក់ (ស្រី ១នាក់) ទៅកាន់ខេត្តកំពង់ចាម, និង ៩នាក់ (ស្រី ៥នាក់) ទៅកាន់ខេត្តបន្ទាយមានជ័យ។ កិច្ចខិតខំប្រឹងប្រែងនេះ បានបង្ហាញពីការយកចិត្តទុកដាក់របស់អាជ្ញាធរចំពោះសុខសុវត្ថិភាព និងការវិលត្រឡប់របស់ប្រជាពលរដ្ឋខ្មែរពីបរទេស។