By ភ្នំពេញ៖ នៅថ្ងៃទី៣១ ខែតុលា ឆ្នាំ២០២៥ អគ្គស្នងការដ្ឋាននគរបាលជាតិ នៃក្រសួងមហាផ្ទៃ បានសម្រេចចាត់តាំងសមាសភាពនាយនគរបាលជាន់ខ្ពស់ចំនួន ១២រូប ដែលដឹកនាំដោយអគ្គស្នងការរងនគរបាលជាតិ ១រូប ដើម្បីចូលរួមអនុវត្តផែនការសកម្មភាពដ៏សំខាន់មួយ ក្នុងកិច្ចសហប្រតិបត្តិការទប់ស្កាត់ និងបង្ក្រាបបទល្មើសឆ្លងដែន រួមមាន ការឆបោកតាមប្រព័ន្ធបច្ចេកវិទ្យា និងការជួញដូរមនុស្ស រវាងកម្ពុជា និងនគរបាលភូមិន្ទថៃ។ កិច្ចព្រមព្រៀងនេះត្រូវបានចុះហត្ថលេខារួមគ្នា កាលពីថ្ងៃទី២៣ ខែតុលា ឆ្នាំ២០២៥។
សេចក្តីសម្រេចដ៏មុតស្រួចនេះ ត្រូវបានរៀបចំឡើងយ៉ាងយកចិត្តទុកដាក់ ស្របតាមខ្លឹមសារនៃផែនការសកម្មភាព ចំណុចទី៨ ដែលនិយាយអំពី “ក្រុមការងារអនុវត្តផែនការសកម្មភាព”។ ព័ត៌មាននេះ ក៏ត្រូវបានបញ្ជូនជាផ្លូវការទៅកាន់ឯកឧត្តម នាយឧត្តមសេនីយ៍ KITTHARATH PUNPETCH អគ្គស្នងការនគរបាលភូមិន្ទថៃ រួចរាល់ហើយ។ នេះគឺជាលទ្ធផលនៃស្មារតីកិច្ចប្រជុំពិសេសលើកទី១ កាលពីថ្ងៃទី១០ ខែកញ្ញា ឆ្នាំ២០២៥ នៅខេត្តកោះកុង និងកិច្ចប្រជុំពិសេសលើកទី២ របស់គណៈកម្មាធិការព្រំដែនទូទៅ (GBC) កាលពីថ្ងៃទី២៣ ខែតុលា ឆ្នាំ២០២៥ នៅទីក្រុងគូឡាឡាំពួ ប្រទេសម៉ាឡេស៊ី។
ផែនការសកម្មភាពសម្រាប់កិច្ចសហប្រតិបត្តិការលើការទប់ស្កាត់ និងបង្ក្រាបបទល្មើសឆ្លងដែន រួមទាំងការឆបោកតាមប្រព័ន្ធបច្ចេកវិទ្យា និងការជួញដូរមនុស្ស រវាងនគរបាលជាតិកម្ពុជា និងនគរបាលភូមិន្ទថៃ នេះ មានគោលបំណងចម្បងពង្រឹងកិច្ចសហប្រតិបត្តិការឱ្យកាន់តែមានប្រសិទ្ធភាព និងប្រសិទ្ធផលខ្ពស់។ នេះនឹងសម្រេចបានតាមរយៈការចែករំលែកព័ត៌មាន ការគាំទ្រគ្នាទៅវិញទៅមកលើបច្ចេកទេសស៊ើបអង្កេត វត្ថុតាង និងការអនុវត្តវិធានការច្បាប់ចំពោះជនសង្ស័យ ដោយគោរពតាមគោលការណ៍ច្បាប់នៃប្រទេសទាំងពីរ។ ដើម្បីឱ្យការអនុវត្តចាប់ផ្តើមភ្លាមៗ ភាគីទាំងពីរត្រូវជូនដំណឹងជាផ្លូវការអំពីសមាសភាពក្រុមការងាររៀងៗខ្លួន។
ការបោះជំហានដ៏សំខាន់នេះ នឹងរួមចំណែកយ៉ាងធំធេងដល់ការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមជូនប្រជាពលរដ្ឋនៃប្រទេសទាំងពីរ។
