By រាជធានីភ្នំពេញ ៖ តារាចម្រៀងដ៏ល្បីល្បាញ អ្នកនាង ពេជ្រ សោភា បានទម្លាយរឿងដ៏គួរឱ្យភ្ញាក់ផ្អើលមួយថា មានបុរសពិសេសម្នាក់នៅពីក្រោយខ្នងនាង តែងតែលើកទឹកចិត្តគ្រប់បែបយ៉ាងទាំងក្នុងគ្រាលំបាក និងជាកម្លាំងចិត្តជំរុញឱ្យនាងបន្តអាជីពចម្រៀងឡើងឆាកជាថ្មី បន្ទាប់ពីស្ទើរតែបោះបង់ចោលទៅហើយ។
បើទោះបីជាតារាចម្រៀងជើងចាស់រូបនេះ មិនបានបញ្ចេញអត្តសញ្ញាណបុរសពិសេសរូបនោះក៏ដោយ ក៏ពេជ្រ សោភា បានចាត់ទុកគាត់ជាមនុស្សអស្ចារ្យបំផុតក្នុងជីវិតនាង ដែលតែងតែផ្ដល់កម្លាំងចិត្តមិនចេះរីងស្ងួត។
អ្នកនាង ពេជ្រ សោភា បានរៀបរាប់ក្នុងឱកាសឡើងឆាកតន្ត្រីទូរទស្សន៍មួយថា នាងអាក់ខានឡើងឆាកនេះអស់ជាងមួយឆ្នាំមកហើយ ដោយសារមូលហេតុមួយចំនួន និងមិនទាន់មានបទចម្រៀងថ្មីសម្រាប់មហាជន។ នាងបន្តថា មានបទចម្រៀងមួយបទគឺ «បងជាពន្លឺ» ដែលជម្រុញចិត្តនាងឱ្យឡើងច្រៀងជាថ្មី ដើម្បីបង្ហាញការដឹងគុណដល់មនុស្សពិសេសរូបនោះចំពោះការលើកទឹកចិត្តគ្រប់បែបយ៉ាង រួមទាំងការច្រៀងផងដែរ។
នាងបញ្ជាក់ថា ពេលខ្លះនាងចង់ឈប់ច្រៀងក៏ពិតមែន ប៉ុន្តែគាត់បានលើកទឹកចិត្តថា បើស្រឡាញ់អ្វីពេញចិត្តអ្វីត្រូវតែបន្តទៀត ព្រោះមានអ្នកគាំទ្រច្រើនដែលចូលចិត្ត ហើយជាពិសេសគឺការផ្ដល់កម្លាំងចិត្តទាំងរឿងតូចធំ។ នាងក៏បានផ្ញើបទចម្រៀងនេះទៅកាន់មនុស្សពិសេសដ៏អស្ចារ្យបំផុតក្នុងជីវិត ដែលបានចេញមុខការពារនាងគ្រប់កាលៈទេសៈទាំងអស់។
ជាការកត់សម្គាល់ បើទោះបីជាអ្នកនាង ពេជ្រ សោភា មិនទាន់បញ្ចេញថា បុរសពិសេសរូបនោះជាអ្នកណាក៏ដោយ ក៏មហាជននិងអ្នកគាំទ្របានសង្ស័យថា បុរសខាងលើទំនងជាតារាសម្ដែងលោក ឆឹម សក្កដា។ ការលើកឡើងរបស់ ពេជ្រ សោភា នាពេលនេះ ធ្វើឡើងក្រោយពេលលោក ឆឹម សក្កដា ទើបតែចេញមុខបញ្ជាក់ពីទំនាក់ទំនងជាមួយនាង បន្ទាប់ពីផ្ទុះការសង្ស័យថា ចំណងស្នេហ៍អ្នកទាំងពីរឈានដល់ផ្លូវបែកបាក់។ លោក ឆឹម សក្កដា បានបញ្ជាក់ច្បាស់ៗថា ទំនាក់ទំនងរវាងលោកនិងពេជ្រ សោភា គឺមិនមានបញ្ហាអ្វីនោះឡើយ ខណៈអ្នកគាំទ្រលោកជាច្រើនក៏បានដឹងច្បាស់ដែរ។
ជាមួយរូបភាពស្និទ្ធស្នាលជាមួយ ពេជ្រ សោភា កាលពីពេលកន្លងទៅ លោក ឆឹម សក្កដា បានភ្ជាប់ជាមួយសំណេរបង្ហោះលើបណ្ដាញសង្គមថា ៖ «ពេលខ្ញុំអត់ដែលផុសរូបជាមួយពួកម៉ាកខ្ញុំ មិនមែនមានន័យថាពួកខ្ញុំឈ្លោះគ្នា ឬមិនដែលជួបគ្នាទេ! តែហ្វេនគាត់ខ្លះនិយាយថា បើខ្ញុំអត់ផុសជាមួយគាត់ គេអត់គាំទ្រខ្ញុំទេ ខ្ញុំក៏មិនចង់បានការគាំទ្របែបនេះដែរ ខ្ញុំត្រូវការហ្វេនខ្ញុំពិត ទើបខ្ញុំឈប់ថតរូបផុសរូបជាមួយគាត់ទៀត ណាមួយខ្ញុំចង់ផុសរឿងជាតិច្រើនជាងរឿងផ្ទាល់ខ្លួន»។ លោកបន្តថា ៖ «មួយទៀត ហេតុអ្វីខ្ញុំផុសជាមួយអ្នកផ្សេង? ព្រោះហ្វេនខ្ញុំគេដឹងហើយ ហើយគេក៏នៅតែគាំទ្រខ្ញុំធម្មតា ហើយហ្វេនគាត់ឈប់គាំទ្រខ្ញុំ ក៏គ្មានបញ្ហាដែរ ព្រោះខ្ញុំត្រូវការហ្វេនពិតប្រាកដរបស់ខ្ញុំដូចគ្នា មិនត្រូវការហ្វេនក្លែងក្លាយ! គាំទ្រខ្ញុំជាខ្ញុំ មិនមែនគាំទ្រខ្ញុំព្រោះតែមិត្តភក្កិខ្ញុំ»។ តែបើអ្នកគាំទ្រទាំងពីរ ពួកគាត់តែងយល់ និងផ្ដល់ឯកជនភាពដល់ពួកខ្ញុំធម្មតា ដោយមិនលំអៀងទៅខាងណា។ យ៉ាងណាសូមគោរពអរគុណដែលអ្នកគាំទ្រពួកខ្ញុំរហូតមក។
ជាការកត់សម្គាល់ បន្ទាប់ពីការបង្ហោះសំណេរខាងលើពីលោក ឆឹម សក្កដា គេក៏ឃើញអ្នកនាង ពេជ្រ សោភា ក៏បានចូលខមមិនដែរថា ៖ «គ្រប់គ្នាគិតឃើញអីហ្នឹង ពួកខ្ញុំជាមិត្តល្អនឹងគ្នាឆាតរកគ្នារហូតតើ»។ តាមរយៈការអះអាងខាងលើនេះ គេកាន់តែច្បាស់ថា ទំនាក់ទំនងរវាងអ្នកទាំងពីរគឺមិនមានរឿងប្រេះឆាអ្វីនោះឡើយ បើទោះបីជាពេលនេះគេនៅមិនទាន់ដឹងថា ទំនាក់ទំនងរបស់ពួកគេកាន់តែវិវត្តន៍ទៅយ៉ាងណាក៏ដោយ។
