By អាជ្ញាធរអង់គ្លេសបានបង្កើនកម្លាំងប៉ូលិសបន្ថែមនៅលើរថភ្លើង និងតាមបណ្ដាស្ថានីយនានា ដើម្បីធានាសុវត្ថិភាពសាធារណជន ក្រោយមានហេតុការណ៍ចាក់ប្រហារដោយកាំបិតដ៏គួរឲ្យតក់ស្លុតក្នុងការធ្វើដំណើរតាមរថភ្លើងមួយ កាលពីថ្ងៃទី២ វិច្ឆិកា ដែលបណ្ដាលឲ្យមានជនរងគ្រោះរហូតដល់ ១០នាក់។ ដំបូងហេតុការណ៍នេះត្រូវបានដាក់ការសង្ស័យថាជា«អំពើភេរវកម្ម»។
យោងតាមការរាយការណ៍របស់ទូរទស្សន៍ Sky News លោកស្រី Heidi Alexander រដ្ឋមន្ត្រីដឹកជញ្ជូនអង់គ្លេស បានហៅហេតុការណ៍ចាក់ដោយកាំបិតនេះថាជា «ឧប្បត្តិហេតុដ៏គួរឲ្យតក់ស្លុត» ហើយបានបញ្ជាក់ពីការបង្កើនវត្តមានប៉ូលិសយ៉ាងច្រើននៅតាមបណ្ដាស្ថានីយ៍ និងនៅលើរថភ្លើង ដើម្បីធានាសុវត្ថិភាពជូនសាធារណជន។
ក្រោយផ្ទុះអំពើហិង្សានេះ ជនរងគ្រោះ ២នាក់ក្នុងចំណោម ១០នាក់ កំពុងតែប្រឹងប្រែងជម្នះដើម្បីមានជីវិតរស់រានមានជីវិត ក្នុងអំពើវាយប្រហារដ៏សាហាវនេះដែលបានកើតឡើងលើរថភ្លើងពី Doncaster នៃទីក្រុង Cambridge ឆ្ពោះទៅកាន់ King’s Cross ក្នុងទីក្រុងឡុងដ៍។
អំពើវាយប្រហារដ៏ហិង្សានេះត្រូវបានប្រព្រឹត្តដោយបុរសជនជាតិអង់គ្លេស ២រូប ដោយម្នាក់អាយុ ៣២ឆ្នាំ និងម្នាក់ទៀតអាយុ ៣៥ឆ្នាំ។ ក្នុងដំណាក់កាលដំបូង ប៉ូលិសអង់គ្លេសបានដាក់ការសង្ស័យថាជាអំពើភេរវកម្ម ប៉ុន្តែយោងតាមសេចក្ដីរាយការណ៍ជាបន្តបន្ទាប់របស់សារព័ត៌មានអង់គ្លេស គ្មានសញ្ញាណាមួយបញ្ជាក់ថាពាក់ព័ន្ធនឹងអំពើភេរវកម្មនោះទេ។
តាមការរាយការណ៍របស់ Sky News ទៀតថា ព្រះមហាក្សត្រអង់គ្លេស និងម្ចាស់ក្សត្រី បានចេញរាជសារសម្ដែងការ «រន្ធត់ចិត្តខ្លាំងណាស់» ចំពោះការវាយប្រហារដ៏គួរឲ្យខ្លាចនេះ ខណៈនាយករដ្ឋមន្ត្រីអង់គ្លេសលោក Keir Starmer បានពណ៌នាអំពីការចាក់សម្លាប់នេះថាជាការព្រួយបារម្ភយ៉ាងខ្លាំង។
ជនបង្កទាំងពីរនាក់នោះជាជនជាតិអង់គ្លេស ដោយម្នាក់អាយុ ៣២ឆ្នាំជាជនជាតិស្បែកខ្មៅ និងម្នាក់ទៀតអាយុ ៣៥ឆ្នាំមានដើមកំណើតពីតំបន់សមុទ្រការីប៊ីន។ ជនបង្កទាំងពីរត្រូវបានចាប់ខ្លួនបញ្ជូនទៅឃុំឃាំងនៅប៉ុស្តិ៍ប៉ូលិស។
សេចក្ដីរាយការណ៍របស់ 9news បានដកស្រង់សម្ដីមន្ត្រីជំនាញប្រឆាំងភេរវកម្មដែលបាននិយាយថា ក្នុងដំណាក់កាលនេះ មិនមានអ្វីអាចបង្ហាញថានេះជាឧប្បត្តិហេតុភេរវកម្មទេ។ ក្នុងឧបទ្ទវហេតុនេះ មានមនុស្ស ១១នាក់បានរងផលប៉ះពាល់ ដោយ ១០នាក់ត្រូវបានបញ្ជូនទៅមន្ទីរពេទ្យដោយរថយន្តសង្គ្រោះ ហើយជនរងគ្រោះម្នាក់បានទៅមន្ទីរពេទ្យដោយខ្លួនឯង។ មិនមានសេចក្ដីរាយការណ៍ថាមានជនរងគ្រោះស្លាប់ក្នុងអំពើហិង្សានេះទេ។
