💥ដំណឹងល្អ! វៀតណាមបើកទំព័រថ្មី បន្តនាំចេញទុរេនទៅចិនជាធម្មតាវិញហើយ ក្រោយដោះស្រាយវិបត្តិចំណុចបច្ចេកទេស!

ដំណឹងល្អបានកើតឡើងសម្រាប់វិស័យកសិកម្មវៀតណាម! ការនាំចេញផ្លែទុរេនដ៏ឈ្ងុយឆ្ងាញ់របស់វៀតណាមទៅកាន់ទីផ្សារដ៏ធំរបស់ចិន ឥឡូវនេះបានដំណើរការជាប្រក្រតីឡើងវិញហើយ បន្ទាប់ពីមានការរអាក់រអួលមួយរយៈកាលពីខែមុន ដោយសារបញ្ហាបច្ចេកទេសនៃការត្រួតពិនិត្យគុណភាព និងសារធាតុគីមី។ នេះបើតាមការចុះផ្សាយរបស់កាសែត VnExpress។

បច្ចុប្បន្ន គេសង្កេតឃើញមានរថយន្តដឹកទុរេនប្រមាណ ៤០០ គ្រឿង កំពុងបន្តឆ្លងកាត់ច្រកព្រំដែនជារៀងរាល់ថ្ងៃ ដើម្បីបំពេញតម្រូវការទីផ្សារចិន។ មន្ត្រីជំនាញវៀតណាមបានបញ្ជាក់ថា ក្នុងចំណោមនោះ មានប្រហែល ២០០-២៥០ គ្រឿងឆ្លងកាត់ច្រកព្រំដែន Lang Son, ១០០-១៥០ គ្រឿងឆ្លងកាត់ច្រកព្រំដែន Lao Cai និងប្រហែល ៥០ គ្រឿងទៀតឆ្លងកាត់ច្រកព្រំដែន Mong Cai។

គួររំឭកផងដែរថា កាលពីខែតុលា កសិករវៀតណាមជាច្រើនបានជួបទុក្ខលំបាកយ៉ាងខ្លាំង នៅពេលដែលមន្ទីរពិសោធន៍វៀតណាមបានផ្អាកការត្រួតពិនិត្យគុណភាពផ្លែទុរេន ដែលបណ្តាលឱ្យការនាំចេញជាប់គាំងទាំងស្រុង។ ផលប៉ះពាល់គឺធ្ងន់ធ្ងរ រហូតដល់កសិករខ្លះបង្ខំចិត្តទុកផ្លែទុរេនឱ្យស្អុយចោលក្នុងចម្ការ ដោយគ្មានឈ្មួញទិញ ហើយតម្លៃក៏ធ្លាក់ចុះទាបរកចំណេញមិនបាន។

ដោយមើលឃើញពីវិបត្តិដ៏ធ្ងន់ធ្ងរនេះ ក្រសួងកសិកម្ម និងបរិស្ថានវៀតណាម បានចេញបញ្ជាភ្លាមៗទៅកាន់អង្គភាពជំនាញទាំងអស់ឱ្យសម្របសម្រួលយ៉ាងយកចិត្តទុកដាក់ជាមួយភាគីចិន ដើម្បីស្វែងរកដំណោះស្រាយបច្ចេកទេសនីមួយៗ ដោយមានគោលដៅច្បាស់លាស់ គឺ «ធានាថាគ្មានការដឹកជញ្ជូនណាមួយត្រូវបានរំខានដោយសារតែនីតិវិធីបច្ចេកទេសនោះទេ»។

លោក Le Anh Trung ប្រធានសមាគមទុរេនខេត្តដាក់ឡាក់ បានថ្លែងអំណរគុណដល់ការអន្តរាគមន៍របស់ក្រសួង ដោយលោកបានបញ្ជាក់ថា មន្ទីរពិសោធន៍វៀតណាមបានបន្តការត្រួតពិនិត្យឡើងវិញ ដើម្បីដោះស្រាយបញ្ហាដែលកើតឡើង ដែលទីបំផុតបាននាំឱ្យការនាំចេញទុរេនទៅចិនបើកដំណើរការឡើងវិញជាស្ថាពរ។