By ប្រធានាធិបតីឥណ្ឌូណេស៊ី លោក Prabowo Subianto បានណែនាំកងកម្លាំងប្រដាប់អាវុធជាតិឥណ្ឌូណេស៊ី (TNI) ឱ្យបញ្ជាទិញយន្តហោះយោធាដឹកជញ្ជូន Airbus A400M ចំនួន៤គ្រឿងបន្ថែមទៀត។ ការបន្ថែមនេះគឺក្នុងគោលបំណងពង្រឹងសមត្ថភាពក្នុងប្រតិបត្តិការសង្គ្រោះគ្រោះមហន្តរាយ និងកិច្ចខិតខំប្រឹងប្រែងមនុស្សធម៌អន្តរជាតិ។ ព័ត៌មាននេះត្រូវបានទីភ្នាក់ងារព័ត៌មាន Reuters ចេញផ្សាយនៅថ្ងៃទី០៣ ខែវិច្ឆិកា។
បទបញ្ជាសំខាន់នេះបានកើតឡើងក្នុងអំឡុងពេលដែលលោក Prabowo បានប្រគល់យន្តហោះដឹកជញ្ជូន Airbus A400M ថ្មីមួយគ្រឿងទៀតជាផ្លូវការទៅឱ្យ TNI នៅមូលដ្ឋានទ័ពអាកាស Halim Perdanakusuma ក្នុងទីក្រុងហ្សាកាតា។ យន្តហោះថ្មីនេះមានលេខ A-4001 ដែលបានហោះពីទីក្រុង Seville ប្រទេសអេស្ប៉ាញ មកដល់ឥណ្ឌូណេស៊ីដោយចំណាយពេល៣ថ្ងៃ។
លោក Prabowo បានបញ្ជាក់ថា យន្តហោះដ៏ទំនើបនេះនឹងត្រូវប្រើប្រាស់សម្រាប់ការឆ្លើយតបនឹងគ្រោះមហន្តរាយធម្មជាតិ ដូចជាការជម្លៀសជនរងគ្រោះ ការផ្តល់ជំនួយផ្នែកវេជ្ជសាស្ត្រ និងសម្ភារៈចាំបាច់នានា។ លោកក៏បានលើកឡើងផងដែរថា ប្រទេសឥណ្ឌូណេស៊ីគួរតែជួយប្រទេសដទៃទៀតក្នុងគ្រាអាសន្ន ស្របពេលដែលប្រទេសនានាធ្លាប់បានជួយឥណ្ឌូណេស៊ីវិញក្នុងអំឡុងរលកយក្សស៊ូណាមិនៅខេត្ត Aceh ឆ្នាំ២០០៤ និងការរញ្ជួយដីដ៏ខ្លាំងកាលពីឆ្នាំ២០១៨។ ថ្មីៗនេះ ឥណ្ឌូណេស៊ីក៏បានបញ្ជូនយន្តហោះ Hercules ទៅកាន់ប្រទេសតួកគីបន្ទាប់ពីរញ្ជួយដីដ៏ធំមួយ ហើយបច្ចុប្បន្នក៏នៅតែមានក្រុមគ្រូពេទ្យបន្តប្រតិបត្តិការនៅហ្គាហ្សាជាមួយអារ៉ាប់រួម (UAE)។
យន្តហោះ A400M ដែលផលិតដោយក្រុមហ៊ុន Airbus នេះមានសមត្ថភាពផ្ទុកទំនិញធ្ងន់ៗបានយ៉ាងច្រើនដូចជា រថពាសដែក និងឧទ្ធម្ភាគចក្រ។ អ្វីដែលកាន់តែពិសេសនោះ គឺវាអាចចុះចតលើផ្លូវរត់ខ្លី ឬមិនទាន់ក្រាលកៅស៊ូបានយ៉ាងងាយស្រួល ដែលធ្វើឱ្យវាស័ក្តិសមបំផុតសម្រាប់បេសកកម្មយោធា និងមនុស្សធម៌គ្រប់ប្រភេទ។
គួររំលឹកផងដែរថា ក្រសួងការពារជាតិឥណ្ឌូណេស៊ីបានចុះហត្ថលេខាលើកិច្ចព្រមព្រៀងមួយក្នុងឆ្នាំ២០២១ ដើម្បីទិញយន្តហោះ A400M ចំនួនពីរគ្រឿង និងមានគម្រោងទិញបន្ថែមចំនួន៤គ្រឿងទៀតនាពេលអនាគត។ ការបន្ថែមយន្តហោះថ្មីៗទាំងនេះនឹងជួយពង្រឹងសមត្ថភាពរបស់ប្រទេសឥណ្ឌូណេស៊ីក្នុងការឆ្លើយតបយ៉ាងឆាប់រហ័សចំពោះគ្រោះមហន្តរាយទាំងក្នុងស្រុក និងក្រៅប្រទេសឱ្យកាន់តែមានប្រសិទ្ធភាព។
