By ចិនជាមហាអំណាចសេដ្ឋកិច្ចប្រចាំតំបន់អាស៊ី បានសម្រេចពង្រីករយៈពេលនៃគោលនយោបាយលើកលែងទិដ្ឋាការ (Visa-Free) ដល់បណ្ដាប្រទេសនៅតំបន់អឺរ៉ុបមួយចំនួន រហូតដល់ដំណាច់ឆ្នាំ២០២៦។ ការសម្រេចចិត្តនេះធ្វើឡើងក្នុងគោលបំណងជំរុញកំណើនទេសចរណ៍ និងជួយជំរុញសកម្មភាពសេដ្ឋកិច្ចជាតិ។
យោងតាមការចុះផ្សាយរបស់ទីភ្នាក់ងារព័ត៌មាន Reuters ក្រសួងការបរទេសចិនបានប្រកាសកាលពីថ្ងៃចន្ទ ទី៣ ខែវិច្ឆិកា ថា ចិននឹងបន្តអនុវត្តគោលនយោបាយលើកលែងទិដ្ឋាការសម្រាប់បណ្ដាប្រទេសជាច្រើន រួមទាំងប្រទេសបារាំង រហូតដល់ថ្ងៃទី៣១ ខែធ្នូ ឆ្នាំ២០២៦។ ការពង្រីកគម្រោងនេះក៏នឹងគ្របដណ្ដប់ដល់ប្រទេសស៊ុយអែតផងដែរ ដែលនឹងចាប់ផ្ដើមអនុវត្តចាប់ពីថ្ងៃទី១០ ខែវិច្ឆិកា ខាងមុខនេះ។
គួររំលឹកថា ប្រទេសចិនបានចាប់ផ្ដើមពង្រីកគោលនយោបាយលើកលែងទិដ្ឋាការរបស់ខ្លួនតាំងពីឆ្នាំ២០២៣ មកម្ល៉េះ ក្នុងគោលបំណងផ្ដល់ការជំរុញដល់វិស័យទេសចរណ៍ក្រោយវិបត្តិកូវីដ-១៩។ ក្នុងនោះក៏មានការបញ្ចូលបណ្ដាប្រទេសមួយចំនួននៅអឺរ៉ុបដូចជា បារាំង អាល្លឺម៉ង់ អ៊ីតាលី ហូឡង់ អេស្ប៉ាញ និងប្រទេសម៉ាឡេស៊ីនៅតំបន់អាស៊ីអាគ្នេយ៍ផងដែរ។
បន្ថែមពីនេះ កាលពីខែកញ្ញាកន្លងទៅ ចិនក៏បានបន្តអនុវត្តកម្មវិធីធ្វើដំណើរដោយគ្មានទិដ្ឋាការដល់អ្នកកាន់លិខិតឆ្លងដែនធម្មតាពីប្រទេសរុស្ស៊ីផងដែរ។
