By ភ្នំពេញ ៖ ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើងនៅព្រឹកព្រលឹមថ្ងៃទី៣ ខែវិច្ឆិកា ឆ្នាំ២០២៥ ដោយបុរសម្នាក់កំពុងជិះកង់ហាត់ប្រាណតាមផ្លូវភ្នំពេញ-ហាណូយ ត្រូវរថយន្តមួយគ្រឿងបុកពីក្រោយពេញទំហឹង បណ្ដាលឲ្យស្លាប់បោកក្បាលនៅនឹងកន្លែងកើតហេតុ។ អ្វីដែលគួរឲ្យភ្ញាក់ផ្អើលនោះ គឺរថយន្តបង្កបានកិនអូសកង់ជនរងគ្រោះទៅជាមួយជិត ១០គីឡូម៉ែត្រ មុននឹងទម្លាក់ចោលរួចគេចខ្លួនបាត់ស្រមោល។ 
សាកសពជនរងគ្រោះត្រូវបានគេស្គាល់អត្តសញ្ញាណថាឈ្មោះ អៀង ចិន្តា ភេទប្រុស អាយុ ៥៤ឆ្នាំ មានលំនៅភូមិដីថ្មី សង្កាត់គោកឃ្លាំង ខណ្ឌសែនសុខ រាជធានីភ្នំពេញ។ ហេតុការណ៍ដ៏សោកសៅនេះបានកើតឡើងនៅវេលាម៉ោង ៥និង៣០នាទីព្រឹក នៅលើកំណាត់ផ្លូវភ្នំពេញ-ហាណូយ ខាងជើងស្ពានអាកាសផ្សារដីហុយ ក្នុងសង្កាត់ទឹកថ្លា ខណ្ឌសែនសុខ។ 
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ លោក អៀង ចិន្តា តែងតែចេញជិះកង់ហាត់ប្រាណនៅពេលព្រឹកព្រលឹមជាប្រចាំដូចសព្វមួយដង។ នៅថ្ងៃកើតហេតុ លោកបានជិះកង់ធ្វើដំណើរតាមបណ្ដោយផ្លូវភ្នំពេញថ្មី-ហាណូយ ក្នុងទិសដៅពីជើងទៅត្បូង លុះមកដល់ចំណុចកើតហេតុក្បែរស្ពានអាកាសផ្សារដីហុយ ស្រាប់តែមានរថយន្តមិនស្គាល់ម៉ាកមួយគ្រឿងបើកបរក្នុងល្បឿនលឿនពីក្រោយមកបុកពេញទំហឹង បណ្ដាលឲ្យលោកដួលបោកក្បាលស្លាប់ភ្លាមៗតែម្តង។ 
ក្រោយបង្កហេតុ រថយន្តបង្កពុំបានឈប់ទទួលខុសត្រូវនោះទេ ផ្ទុយទៅវិញបានកិនអូសកង់ជនរងគ្រោះជាប់ពីក្រោមគេចខ្លួនបាត់ទៅ។ នៅវេលាព្រឹកដដែល គេក៏បានប្រទះឃើញកង់របស់ជនរងគ្រោះត្រូវបានកិនដាច់ជាពីរកំណាត់ ជ្រុះនៅតាមបណ្ដោយផ្លូវលេខ ៣៧១ កែងផ្លូវចូលបឹងតាម៉ាត ក្នុងភូមិម័រ សង្កាត់ដង្កោ ខណ្ឌដង្កោ រាជធានីភ្នំពេញ ដែលមានចម្ងាយប្រមាណជិត ១០គីឡូម៉ែត្រពីកន្លែងកើតហេតុ។ កង់ដែលប្រទះឃើញនេះក៏ត្រូវបានសមត្ថកិច្ចខណ្ឌសែនសុខចុះទៅប្រមូលយក។ 
ភ្លាមៗក្រោយកើតហេតុ កម្លាំងនគរបាលមូលដ្ឋានបានចុះទៅដល់ទីតាំងដើម្បីធ្វើការពិនិត្យនិងស្រាវជ្រាវរករថយន្តបង្ក។ តាមព័ត៌មានបឋម រថយន្តបង្កត្រូវបានគេសង្ស័យថាជារថយន្តក្រឡុកស៊ីម៉ង់ត៍។ ទោះជាយ៉ាងណាក៏ដោយ សមត្ថកិច្ចនៅមិនទាន់រកឃើញរថយន្តបង្កនៅឡើយទេ ហើយកំពុងតែបន្តនីតិវិធីស្រាវជ្រាវបន្ថែមដើម្បីនាំខ្លួនជនល្មើសមកផ្ដន្ទាទោសតាមច្បាប់។ បច្ចុប្បន្ន សាកសពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ 
