By បាត់ដំបង៖ ក្រុមក្មេងទំនើង២ក្រុមបានបង្កហិង្សាវាយតប់គ្នាយ៉ាងកក្រើកកាលពីរសៀលថ្ងៃទី២ ខែវិច្ឆិកា ឆ្នាំ២០២៥ម្សិលមិញនេះ នៅលើផ្លូវកៅស៊ូ ភូមិរ៉ា ឃុំធិបតី ស្រុកគាស់ក្រឡ ខេត្តបាត់ដំបង។ ករណីនេះត្រូវបានស្នងការដ្ឋាននគរបាលខេត្តបាត់ដំបងបញ្ជាក់ថា ជាអំពើហិង្សាដោយចេតនាមានស្ថានទម្ងន់ទោស។
ភ្លាមៗក្រោយកើតហេតុ កម្លាំងនគរបាលស្រុកគាស់ក្រឡ ក្រោមការដឹកនាំរបស់លោកអនុសេនីយ៍ឯក ចាន់ ថានូ អធិការនគរបាលស្រុក បានចុះអន្តរាគមន៍និងឃាត់ខ្លួនក្រុមជនសង្ស័យមួយក្រុមមានគ្នា៧នាក់ រួមមាន៖ ទី១. ង៉ែន ផានី ភេទប្រុស អាយុ២០ឆ្នាំ រស់នៅភូមិគារ១ ឃុំគារ ស្រុកមោងឬស្សី (ជាអ្នកកាន់ដំបង)។ ទី២. វេន រាវី ភេទប្រុស អាយុ១៧ឆ្នាំ រស់នៅភូមិឬស្សី២ ឃុំមោង ស្រុកមោងឬស្សី។ ទី៣. សឹង វិចិត្រ អាយុ១៩ឆ្នាំ រស់នៅភូមិឬស្សី២ ឃុំមោង ស្រុកមោងឬស្សី។ ទី៤. វ័ន ដាវីត ភេទប្រុស អាយុ២០ឆ្នាំ រស់នៅភូមិឬស្សី២ ឃុំមោង ស្រុកមោងឬស្សី។ ទី៥. ហ៊ាប ស៊ូហៀង ភេទប្រុស អាយុ២២ឆ្នាំ រស់នៅភូមិតាតុក ឃុំមោង ស្រុកមោងឬស្សី។ ទី៦. កយ មិនា ភេទប្រុស អាយុ១៧ឆ្នាំ រស់នៅភូមិពោធ២ ឃុំគារ ស្រុកមោងឬស្សី និងទី៧. ផុំ ភីនួន ភេទប្រុស អាយុ១៦ឆ្នាំ រស់នៅភូមិឬស្សី២ ឃុំមោង ស្រុកមោងឬស្សី។ ជនសង្ស័យទាំង៧នាក់ត្រូវបាននាំខ្លួនទៅកាន់អធិការដ្ឋាននគរបាលស្រុកគាស់ក្រឡដើម្បីធ្វើការសាកសួរ។
តាមការសាកសួរ ក្រុមជនសង្ស័យបានសារភាពថា ពួកគេពិតជាបានដេញវាយនិងគប់គ្នានៅចំណុចកើតហេតុខាងលើមែន។ មូលហេតុគឺបណ្តាលមកពីជម្លោះពាក្យសម្តី និងគំនុំចាស់ រហូតឈានដល់ការបង្កហិង្សានេះឡើង។ សមត្ថកិច្ចក៏បានដកហូតវត្ថុតាងជាដំបងឈើមួយដើមផងដែរ។
បច្ចុប្បន្ន នៅព្រឹកថ្ងៃទី៣ ខែវិច្ឆិកា ឆ្នាំ២០២៥នេះ ជនសង្ស័យទាំង៧នាក់កំពុងត្រូវបានសមត្ថកិច្ចជំនាញកសាងសំណុំរឿងដើម្បីបញ្ជូនបន្តទៅការិយាល័យជំនាញខេត្តចាត់ការតាមនីតិវិធីច្បាប់។
