By ភ្នំពេញ៖ នៅថ្ងៃទី០៣ ខែវិច្ឆិកា ឆ្នាំ២០២៥ យុវជនអ្នកផលិតមាតិកាម្នាក់ដែលប្រើឈ្មោះ «បញ្ញា-Panha» ដែលបានផលិតវីដេអូមានលក្ខណៈប៉ះពាល់ដល់កិត្តិយសខេត្តតាកែវ បានបង្ហាញខ្លួនចំពោះមុខសមត្ថកិច្ច និងបានចុះហត្ថលេខាលើលិខិតកិច្ចសន្យាបញ្ឈប់ជាស្ថាពរនូវរាល់ទង្វើទាំងឡាយណាដែលអាចបង្កផលប៉ះពាល់ដល់កិត្តិយសខេត្តតាកែវ ក៏ដូចជាខេត្តដទៃទៀតនៅកម្ពុជា។
នៅក្នុងកិច្ចសន្យាដែលធ្វើឡើងចំពោះមុខសមត្ថកិច្ច លោក តែត បញ្ញា ដែលមានអាយុ ២០ ឆ្នាំ មានទីលំនៅភូមិហាន់ទា ឃុំកំពែង ស្រុកគិរីវង្ស ខេត្តតាកែវ បានប្តេជ្ញាចិត្តដូចខាងក្រោម៖
១៖ បញ្ឈប់ជាបន្ទាន់នូវរាល់ទង្វើទុច្ចរិតទាំងឡាយណាដែលអាចនាំឲ្យប៉ះពាល់ដល់កិត្តិយសខេត្តតាកែវ។
២៖ បញ្ឈប់ជាបន្ទាន់នូវរាល់ទង្វើទុច្ចរិតទាំងឡាយណាដែលអាចនាំឲ្យប៉ះពាល់ដល់កិត្តិយសរបស់ខេត្តដទៃទៀត។
៣៖ មិនធ្វើខ្លួនជាក្មេងទំនើង ឬបង្កបញ្ហាផ្សេងៗដល់សង្គមជាតិ។
៤៖ មិនធ្វើសកម្មភាពទាំងឡាយណាដែលផ្ទុយនឹងច្បាប់នៃព្រះរាជាណាចក្រកម្ពុជា។
៥៖ ក្នុងករណីមិនគោរពតាមកិច្ចសន្យានេះ លោកយល់ព្រមប្រគល់សិទ្ធិជូនសមត្ថកិច្ចចាត់ចែងតាមនីតិវិធីច្បាប់ជាធរមាន។
គួររំលឹកផងដែរថា ប្រជាពលរដ្ឋនិងអ្នកប្រើប្រាស់បណ្ដាញសង្គម Facebook ជាច្រើនបានសម្តែងការមិនពេញចិត្ត និងប្រតិកម្មយ៉ាងខ្លាំងចំពោះវីដេអូរបស់ «បញ្ញា-Panha» ដែលពួកគាត់ចាត់ទុកថាជាការបង្កើតមាតិកាលេងសើច និងចម្អកចំអន់ទៅលើអ្នកខេត្តតាកែវ ដែលអាចនាំឲ្យមានការស្អប់ខ្ពើម និងការរើសអើង។
វីដេអូដ៏ចម្រូងចម្រាសនោះគឺការដើរសួរយុវជនផ្សេងៗថា «ខេត្តណាសាហាវព្រៃផ្សៃជាងគេ?» ហើយចម្លើយដែលបានទទួលគឺ «ខេត្តតាកែវ»។
បន្ទាប់ពីមានការប្រតិកម្ម លោក បញ្ញា ក៏បានចេញវីដេអូសុំទោសជាសាធារណៈដល់បងប្អូនប្រជាពលរដ្ឋខេត្តតាកែវចំពោះកំហុសឆ្គងរបស់ខ្លួន ហើយក្រសួងព័ត៌មានក៏បានកោះហៅដើម្បីអប់រំណែនាំរួចរាល់ហើយដែរ។
