By រាជធានីភ្នំពេញ៖ តារាសម្ដែងនិងជាអតីតបេក្ខភាពបវរកញ្ញា សំណាង អេលីណា បានទាញចំណាប់អារម្មណ៍សាធារណជនជាថ្មី ដោយចេញមុខអំពាវនាវទៅកាន់ម្ចាស់ម្កុដបវរកញ្ញានីមួយៗឱ្យប្រើប្រាស់តំណែងរបស់ខ្លួនប្រកបដោយតម្លៃនិងកិត្តិយស ព្រោះម្កុដដែលតំណាងប្រទេសជាតិគឺមានតម្លៃលើសលប់។ ការលើកឡើងនេះបានកើតឡើងក្រោយផ្ទុះរឿងរ៉ាវរកាំរកូសជុំវិញការចេញទៅប្រកួត Miss Universe របស់កញ្ញា ហ្វីយ៉ាតា ដែលជាតំណាងប្រទេសកម្ពុជា។
មហាជន ជាពិសេសបណ្ដាអ្នកគាំទ្ររបស់កញ្ញា ហ្វីយ៉ាតា បានសម្តែងការមិនពេញចិត្តយ៉ាងខ្លាំង បន្ទាប់ពីក្រុមហ៊ុនដែលជាអ្នករៀបចំការប្រកួតបានប្រកាសបដិសេធមិនទទួលខុសត្រូវលើការចេញទៅប្រកួតនៅប្រទេសថៃ ខណៈថ្ងៃកំណត់បានខិតជិតមកដល់។ ស្ថានការណ៍នេះបានបង្កឱ្យមានការភ្ញាក់ផ្អើលយ៉ាងខ្លាំងក្នុងមជ្ឈដ្ឋានមហាជន។
ករណីនេះបានក្លាយជាប្រធានបទជជែកវែកញែកយ៉ាងក្តៅគគុកពេញបណ្ដាញសង្គម ដោយមានការលើកទឹកចិត្តជាច្រើនពីអ្នកគាំទ្រនិងសិល្បករចំពោះកញ្ញា ហ្វីយ៉ាតា ។ ទោះបីជា សំណាង អេលីណា មិនបានបញ្ចេញប្រតិកម្មផ្ទាល់លើបញ្ហានេះក៏ដោយ ក្នុងនាមជាអតីតបេក្ខភាពបវរកញ្ញាតំណាងជាតិមួយរូបដែរ នាងក៏បានចេញមុខអំពាវនាវឱ្យម្ចាស់ម្កុដទាំងអស់ប្រើប្រាស់តំណែងរបស់ខ្លួនដោយការទទួលខុសត្រូវនិងឱ្យមានតម្លៃ។
តាមរយៈសំណេរលើបណ្ដាញសង្គម សំណាង អេលីណា បានសង្កត់ធ្ងន់ថា ម្កុដតំណាងជាតិកម្ពុជានីមួយៗសុទ្ធតែមានតម្លៃធំធេងណាស់។ នាងទទូចថា «សូមឱ្យអ្នកដែលគ្រងម្កុដនីមួយៗ ប្រើប្រាស់តំណែងខ្លួនឯងឱ្យមានតម្លៃ និងរក្សាកេរ្តិ៍ឈ្មោះដ៏ល្អសម្រាប់ម្កុដតំណាងជាតិនោះ»។ នាងបន្តទៀតថា «វេទិកាប្រកួតគឺជាកន្លែងដែលអាចធ្វើឱ្យអ្នកក្លាយជាគំរូដ៏ល្អសម្រាប់អ្នកដទៃ ដូច្នេះសូមកុំឱ្យវេទិកាដ៏ថ្លៃថ្នូរនេះ ក្លាយជាកន្លែងនៃការជជែករឿងឥតប្រយោជន៍អី»។
គូសបញ្ជាក់ផងដែរថា សំណាង អេលីណា ធ្លាប់ជាបេក្ខភាព Miss International Cambodia 2023 តំណាងកម្ពុជាទៅប្រកួតលើឆាកអន្តរជាតិ។ ទោះបីជានាងមិនបានគ្រងម្កុដជ័យលាភីក៏ដោយ ក៏នាងនៅតែទទួលបានការគាំទ្រយ៉ាងខ្លាំងក្លាពីមហាជនខ្មែរ។
កន្លងមកនាងក៏ធ្លាប់បានផ្ដល់ជាដំបូន្មានថា បេក្ខនារីដែលចង់ចូលរួមប្រកួតបវរកញ្ញា គួរសិក្សាឱ្យបានស៊ីជម្រៅលើសិល្បៈ ប្រពៃណីវប្បធម៌ខ្មែរ និងស្វែងយល់ច្បាស់ពីគោលបំណងនៃកម្មវិធីប្រកួត ដើម្បីឱ្យមានភាពជឿជាក់។ លើសពីនេះ បេក្ខភាពគ្រប់រូបត្រូវត្រៀមចិត្តរួចរាល់ចំពោះអ្វីដែលអាចកើតឡើងក្នុងអំឡុងពេលប្រកួត ហើយត្រូវមានភាពក្លាហានចាប់យកឱកាសដើម្បីតំណាងជាតិលើឆាកអន្តរជាតិ។
