By ខេត្តបាត់ដំបង៖ កម្លាំងនគរបាលស្រុកគាស់ក្រឡ បានឃាត់ខ្លួនជនសង្ស័យចំនួន ០៧នាក់ ពាក់ព័ន្ធករណីហិង្សាដោយចេតនា ដែលបានកើតឡើងកាលពីវេលាម៉ោង ០៣៖៣០ នាទីរសៀល ថ្ងៃទី០២ ខែវិច្ឆិកា ឆ្នាំ២០២៥។ ហេតុការណ៍នេះបានបង្កការភ្ញាក់ផ្អើលយ៉ាងខ្លាំង នៅលើកំណាត់ផ្លូវកៅស៊ូ ក្នុងភូមិរ៉ា ឃុំធិបតី ស្រុកគាស់ក្រឡ ខេត្តបាត់ដំបង បន្ទាប់ពីភាគីទាំងពីរទាស់សម្ដីគ្នានាំទៅដល់ការវាយតប់គ្នាទៅវិញទៅមក។ នេះបើយោងតាមការឱ្យដឹងពីផេកអគ្គស្នងការដ្ឋាននគរបាលជាតិ។
ប្រភពដដែលបានបន្តថា ក្រោយទទួលបានព័ត៌មានពីករណីនេះ លោកអនុសេនីយ៍ឯក ចាន់ ថានូ អធិការនគរបាលស្រុកគាស់ក្រឡ បានដឹកនាំកម្លាំងចុះទៅដល់ទីតាំងកើតហេតុភ្លាមៗ និងបានឃាត់ខ្លួនជនសង្ស័យមួយក្រុមដែលមានគ្នា ០៧នាក់ រួមមាន៖
១- ឈ្មោះ ង៉ែន ផានី ភេទប្រុស អាយុ២០ឆ្នាំ រស់នៅភូមិគារ១ ឃុំគារ ស្រុកមោងឬស្សី ខេត្តបាត់ដំបង (អ្នកកាន់ដំបង)។
២- ឈ្មោះ វេន រាវី ភេទប្រុស អាយុ១៧ឆ្នាំ រស់នៅភូមិឬស្សី២ ឃុំមោង ស្រុកមោងឬស្សី ខេត្តបាត់ដំបង។
៣- ឈ្មោះ សឹង វិចិត្រ អាយុ១៩ឆ្នាំ រស់នៅភូមិឬស្សី២ ឃុំមោង ស្រុកមោងឬស្សី ខេត្តបាត់ដំបង។
៤- ឈ្មោះ វ័ន ដាវីត ភេទប្រុស អាយុ២០ឆ្នាំ រស់នៅភូមិឬស្សី២ ឃុំមោង ស្រុកមោងឬស្សី ខេត្តបាត់ដំបង។
៥- ឈ្មោះ ហ៊ាប ស៊ូហៀង ភេទប្រុស អាយុ២២ឆ្នាំ រស់នៅភូមិតាតុក ឃុំមោង ស្រុកមោងឬស្សី ខេត្តបាត់ដំបង។
៦- ឈ្មោះ កយ មិនា ភេទប្រុស អាយុ១៧ឆ្នាំ រស់នៅភូមិពោធ២ ឃុំគារ ស្រុកមោងឬស្សី ខេត្តបាត់ដំបង។
៧- ឈ្មោះ ផុំ ភីនួន ភេទប្រុស អាយុ១៦ឆ្នាំ រស់នៅភូមិឬស្សី២ ឃុំមោង ស្រុកមោងឬស្សី ខេត្តបាត់ដំបង។
ក្រោយការសាកសួរ ជនសង្ស័យទាំង ០៧នាក់បានសារភាពថា ពួកគេពិតជាបានដេញវាយ និងគប់គ្នាទៅវិញទៅមកនៅចំណុចកើតហេតុខាងលើ ដោយសារតែមានទំនាស់ពាក្យសម្ដី និងគំនុំរៀងៗខ្លួន។ វត្ថុតាងដែលដកហូតបានរួមមាន ដំបងឈើ ០១ដើម។
បច្ចុប្បន្ន ជនសង្ស័យទាំងអស់ កំពុងត្រូវបានកម្លាំងជំនាញកសាងសំណុំរឿង ដើម្បីបញ្ជូនទៅការិយាល័យជំនាញខេត្ត ចាត់ការបន្តតាមនីតិវិធីច្បាប់។
