By រាជធានីភ្នំពេញ ៖ ក្រសួងធនធានទឹក និងឧតុនិយមបានចេញសេចក្តីប្រកាសព័ត៌មានបន្ទាន់ថា ប្រទេសកម្ពុជានឹងរងឥទ្ធិពលដោយព្យុះទី២៥ ឈ្មោះ «កាលម៉េហ្គី (Kalmaegi)» ដែលនឹងបង្កឲ្យមានភ្លៀងធ្លាក់ខ្លាំង ផ្គររន្ទះ និងខ្យល់កន្ត្រាក់ទូទាំងប្រទេស។
យោងតាមព្រឹត្តិបត្រព័ត៌មានស្តីពីស្ថានភាពធាតុអាកាសនៅព្រះរាជាណាចក្រកម្ពុជា សម្រាប់ថ្ងៃទី៣ ខែវិច្ឆិកា ឆ្នាំ២០២៥ បានបញ្ជាក់ថា សម្ពាធទាបដែលកើតនៅមហាសមុទ្រប៉ាស៊ីហ្វិកខាងលិច បានវិវត្ដទៅជាព្យុះទី២៥ ឈ្មោះ «កាលម៉េហ្គី (Kalmaegi) T2525» ហើយព្យុះនេះនឹងមានឥទ្ធិពលលើរបបខ្យល់មូសុងឦសាន ដែលបក់ឆ្លងកាត់សមុទ្រចិនខាងត្បូង សមុទ្រអានដាមម៉ែន សមុទ្រកម្ពុជា អាងទន្លេមេគង្គ និងផ្ទៃដីព្រះរាជាណាចក្រកម្ពុជាទាំងមូល។
ក្រសួងបានជម្រាបឲ្យដឹងថា ស្ថានភាពអាកាសធាតុបែបនេះនឹងធ្វើឲ្យចាប់ពីថ្ងៃទី៣ ដល់ថ្ងៃទី៥ ខែវិច្ឆិកា ឆ្នាំ២០២៥ តំបន់នីមួយៗនឹងមានលក្ខណៈដូចខាងក្រោម៖
**១. តំបន់វាលទំនាប**៖ មានសីតុណ្ហភាពមធ្យមអប្បបរមា២១°C និងអតិបរមា២៩°C។ ខ្យល់បក់ពីទិសឦសាន និងទិសបូព៌មានល្បឿនមធ្យម៣ម៉ែត្រ/វិនាទី។ ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្ដាល តាកែវ ស្វាយរៀង និងរាជធានីភ្នំពេញ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្ដប់លើផ្ទៃដី៣៥%។
**២. តំបន់ខ្ពង់រាប**៖ មានសីតុណ្ហភាពមធ្យមអប្បបរមា២១°C និងអតិបរមា២៨°C។ ខ្យល់បក់ពីទិសបូព៌ និងទិសអាគ្នេយ៍មានល្បឿនមធ្យម៤ម៉ែត្រ/វិនាទី។ ខេត្តកំពង់ស្ពឺ ប៉ៃលិន ឧត្ដរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្ដប់លើផ្ទៃដី២៥%។
**៣. តំបន់មាត់សមុទ្រ**៖ មានសីតុណ្ហភាពមធ្យមអប្បបរមា២១°C និងអតិបរមា២៨°C។ ខ្យល់បក់ពីទិសនិរតី និងទិសអាគ្នេយ៍មានល្បឿនមធ្យម៥ម៉ែត្រ/វិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្ដប់លើផ្ទៃដី៣៥%។
ក្រសួងក៏បានក្រើនរំលឹកដល់ប្រជាពលរដ្ឋទាំងអស់ឲ្យបង្កើនការប្រុងប្រយ័ត្នខ្ពស់ចំពោះបាតុភូតធម្មជាតិទាំងនេះ។ ចំពោះស្ថានភាពសមុទ្រវិញ នឹងមានកម្ពស់មធ្យមអប្បបរមា០,៥០ម៉ែត្រ និងកម្ពស់មធ្យមអតិបរមា១,៧៥ម៉ែត្រ៕
