By ខេត្តក្រចេះ ៖ ប្រជាពលរដ្ឋនិងមហាជនទាំងអស់មេត្តាជ្រាបថា ស្ពានមិត្តភាពកម្ពុជា-ចិន មេគង្គក្រចេះ នឹងត្រូវបើកឱ្យឆ្លងកាត់ជាផ្លូវការចាប់ពីថ្ងៃទី១ ខែមេសា ឆ្នាំ២០២៦តទៅ ដោយលែងមានការបិទចរាចរណ៍ទៀតហើយ។ នេះបើតាមការប្រកាសរបស់លោក ផន រឹម អ្នកនាំពាក្យក្រសួងសាធារណការនិងដឹកជញ្ជូន កាលពីព្រឹកថ្ងៃទី០៣ ខែវិច្ឆិកាកន្លងទៅ។
បច្ចុប្បន្ន ដំណើរការសាងសង់ស្ពាននេះនៅបន្តបញ្ចប់នូវការងារមួយចំនួនដូចជា៖ ការងារគំនូសចរាចរណ៍លើស្ពាន និងការងារបំពាក់បង្គោលបំភ្លឺស្ពានឱ្យបានរួចរាល់មុនថ្ងៃចូលឆ្នាំប្រពៃណីខ្មែរ ឆ្នាំ២០២៦ខាងមុខ។ ជាមួយគ្នានេះ ក្រុមហ៊ុនសាងសង់ក៏នឹងបន្តពន្លឿនការងារសាងសង់ផ្លូវមេតភ្ជាប់ និងផ្លូវខ្នែងនានាឱ្យបានរួចរាល់មុនកាលកំណត់ក្នុងកិច្ចសន្យាផងដែរ។
គិតត្រឹមដើមខែវិច្ឆិកា ឆ្នាំ២០២៥នេះ វឌ្ឍនភាពនៃការសាងសង់ស្ពានមិត្តភាពកម្ពុជា-ចិន មេគង្គក្រចេះ បានសម្រេចរហូតដល់ ៩៨,៣៦% ហើយ។ ចំណែកឯគម្រោងទាំងមូល ដែលរួមមានស្ពាន ផ្លូវតភ្ជាប់ និងហេដ្ឋារចនាសម្ព័ន្ធរណបមួយចំនួនទៀត បានសម្រេចវឌ្ឍនភាពសាងសង់បាន ៨៧,៣៩%។
ស្ពានមិត្តភាពកម្ពុជា-ចិន មេគង្គក្រចេះនេះ មានទីតាំងត្រើយខាងកើតស្ថិតនៅភូមិតាលុស ឃុំបុសលាវ ស្រុកចិត្របុរី ខណៈត្រើយខាងលិចស្ថិតនៅភូមិថ្មរាប ឃុំព្រែកប្រសព្វ ស្រុកព្រែកប្រសព្វ។ ស្ពាននេះមានមុខកាត់ទទឹងជាង ១៣ម៉ែត្រ ដោយមានគន្លងផ្លូវសម្រាប់រថយន្តចំនួន ២គន្លងទៅ-មក, គន្លងផ្លូវសម្រាប់ទោចក្រយានយន្តចំនួន ២គន្លងទៅ-មក និងផ្លូវថ្មើរជើងចំនួន ២គន្លងទៅ-មក ប្រវែង ១ម៉ែត្រ រួមជាមួយបង្កាន់ដៃស្ពានសងខាងយ៉ាងរឹងមាំ។
សម្រាប់ផ្លូវតភ្ជាប់វិញ មានប្រវែងសរុបជាង ៣២គីឡូម៉ែត្រ ដែលរួមមានផ្លូវតភ្ជាប់ពីក្បាលស្ពានប្រវែងជាង ១៥គីឡូម៉ែត្រ និងផ្លូវខ្នែងចំនួន ៤ខ្សែនៅក្នុងក្រុងក្រចេះ មានប្រវែងជាង ១៦គីឡូម៉ែត្រ។ ខ្សែផ្លូវទាំងនេះត្រូវបានសាងសង់ពង្រីក និងលើកកម្ពស់គុណភាពដោយក្រាលបេតុងកៅស៊ូ(AC)កម្រាស់ ៧សង់ទីម៉ែត្រដូចគ្នា។
ក្នុងចំណោមនោះ កំណាត់ផ្លូវ៤ខ្សែ ប្រវែងជិត ២៧គីឡូម៉ែត្រ ត្រូវបានស្ថាបនាពង្រីកទទឹងចាប់ពី ៩ម៉ែត្រ ដល់ ១៣ម៉ែត្រ លើតួផ្លូវចាប់ពី ១១ម៉ែត្រ ដល់ជិត ២០ម៉ែត្រ។ ចំណែកកំណាត់ផ្លូវ១ខ្សែទៀត ប្រវែងជាង ៥គីឡូម៉ែត្រ ត្រូវបានពង្រីកទទឹង ១៩ម៉ែត្រ លើតួផ្លូវ ៣០ម៉ែត្រ ដោយមានពុះទ្រូងផ្លូវនៅចំកណ្តាលដើម្បីធ្វើសួនរុក្ខជាតិបៃតងប្រវែង ៤ម៉ែត្រផងដែរ។
ស្ពាននិងផ្លូវ គឺជាសរសៃឈាមនៃសេដ្ឋកិច្ចជាតិ និងជាអាទិភាពគន្លឹះទី២ ក្នុងចំណោមអាទិភាពទាំង៥ «មនុស្ស ផ្លូវ ទឹក ភ្លើង និងបច្ចេកវិទ្យា» នៃយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាល។ ក្នុងកិច្ចការអាទិភាពទី២ នៃបញ្ចកោណទី២ គឺការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន។
គម្រោងស្ពាននេះក៏ជាយុទ្ធសាស្ត្រដ៏សំខាន់សម្រាប់ការតភ្ជាប់ទំនាក់ទំនង និងជាក្តីសង្ឃឹមរវាងប្រជាពលរដ្ឋដែលរស់នៅត្រើយខាងកើត និងត្រើយខាងលិចទន្លេមេគង្គ។ វានឹងជួយតភ្ជាប់តំបន់ដាច់ស្រយាលនៅភូមិភាគឦសានឱ្យមកកាន់ទីប្រជុំជនកាន់តែងាយស្រួល ព្រមទាំងតភ្ជាប់ពីខេត្តក្រចេះទៅខេត្តកំពង់ធំ ដែលមានភាពប្រទាក់ក្រឡាគ្នាជាមួយផ្លូវជាតិសំខាន់ៗនៃបណ្តាខេត្តដទៃទៀត។
