ឱកាសមាស៖ កសិករខ្មែរត្រូវចាប់យកទីផ្សារបន្លែផ្លែឈើក្នុងស្រុក ក្រោយកម្ពុជាហាមឃាត់ការនាំចូលពីថៃ
នេះគឺជាពេលវេលាមាសដើម្បីកម្ពុជាពង្រឹងសមត្ថភាពផ្គត់ផ្គង់ទីផ្សារបន្លែនិងផ្លែឈើដោយខ្លួនឯងហើយរំដោះខ្លួនចេញពីការពឹងផ្អែកលើបរទេស។ ភាពតានតឹងដែលឈានដល់ការរឹតត្បិតច្រកព្រំដែនដែលបង្កឡើងដោយភាគីថៃជាឯកតោភាគីកាលពីថ្ងៃទី០៧ ខែមិថុនា ឆ្នាំ២០២៥ រហូតឈានដល់ការហាមឃាត់ការនាំចូលបន្លែនិងផ្លែឈើថៃមិនអោយ ចូលប្រទេស១០ថ្ងៃក្រោយមក គឺជាឱកាសដែលអ្នករកស៊ីនិងអ្នកដាំបន្លែនិងផ្លែឈើនៅក្នុងស្រុកគួរតែរួមគ្នាច្បាមឱកាសនេះ ពង្រឹងហើយពង្រីកសក្តានុពលទីផ្សារ ដើម្បីកាត់បន្ថយតម្រូវការឫការពឹងផ្អែកលើ ផលិតផលពីប្រទេសជិតខាង ។ កុំមើលស្រាលអំពីទំហំនិងតម្រូវការនៃទីផ្សារបន្លែនិងផ្លែឈើនេះឲ្យសោះ ។ ជាការពិតតាមឯកសារវិទ្យាសាស្ត្រមួយចំនួនបានលើកឡើងថា នៅក្នុងមួយថ្ងៃមនុស្សម្នាក់ត្រូវការហូបបន្លែ និង ផ្លែឈើប្រមាណជា ៤០០ ក្រាម ប៉ុន្តែសម្រាប់ពលរដ្ឋកម្ពុជាប្រហែលជាមិនហូបច្រើនដល់ថ្នាក់នោះទេ…
