By ភ្នំពេញ៖ កិច្ចសន្ទនាយុទ្ធសាស្ត្រកម្រិតខ្ពស់រវាងកម្ពុជា និងចិន នឹងចាប់ផ្ដើមឡើងនៅល្ងាចថ្ងៃទី២២ ខែមេសា ខាងមុខនេះ ដោយមានការចូលរួមពីរដ្ឋមន្ត្រីការបរទេស និងរដ្ឋមន្ត្រីការពារជាតិពីភាគីទាំងពីរ។
កិច្ចប្រជុំលើកដំបូងនៃកិច្ចសន្ទនាយុទ្ធសាស្ត្រប្រភេទ ២+២ នេះ នឹងធ្វើឡើងនៅក្នុងប្រទេសកម្ពុជា ដោយមានរដ្ឋមន្ត្រីការបរទេសចិន លោក វ៉ាង យី និងរដ្ឋមន្ត្រីការពារជាតិចិន លោក ដុង ជុន (Dong Jun) ជួបជាមួយរដ្ឋមន្ត្រីការបរទេសកម្ពុជា លោកឧបនាយករដ្ឋមន្ត្រី ប្រាក់ សុខុន និងរដ្ឋមន្ត្រីការពារជាតិកម្ពុជា លោកឧបនាយករដ្ឋមន្ត្រី ទៀ សីហា។
កិច្ចប្រជុំនេះត្រូវបានរៀបចំឡើងក្នុងគោលបំណងពិភាក្សាអំពីបញ្ហាសំខាន់ៗជាច្រើនដែលទាក់ទងនឹងទំនាក់ទំនងយុទ្ធសាស្ត្ររវាងប្រទេសទាំងពីរ រួមមានកិច្ចសហប្រតិបត្តិការក្នុងវិស័យសន្តិសុខ ការពារជាតិ និងកិច្ចសហការអន្តរជាតិ។
ការប្រជុំនេះគឺជាការអភិវឌ្ឍន៍ថ្មីមួយក្នុងទំនាក់ទំនងរវាងកម្ពុជា និងចិន ដែលបង្ហាញពីការពង្រឹងទំនាក់ទំនងយុទ្ធសាស្ត្រនិងកិច្ចសហប្រតិបត្តិការរវាងប្រទេសទាំងពីរ។ អ្នកវិភាគយល់ឃើញថា កិច្ចសន្ទនានេះនឹងជួយពង្រឹងសន្តិសុខ និងស្ថិរភាពក្នុងតំបន់។
ដោយ៖ សូរិយា
