ត្រាំព្រមានអ៊ីរ៉ង់៖ បទឈប់បាញ់អាចត្រូវបញ្ចប់ បើចរចាមិនដំណើរការ

អាមេរិកអាចនឹងមិនបន្តកិច្ចព្រមព្រៀងឈប់បាញ់ជាមួយអ៊ីរ៉ង់ទៀតទេ ប្រសិនបើការចរចាសន្តិភាពមិនឈានដល់លទ្ធផលនៅថ្ងៃពុធសប្តាហ៍នេះ។

លោកដូណាល់ ត្រាំ បានផ្តល់បទសម្ភាសន៍ក្តៅគគុកកាលពីថ្ងៃចន្ទទី២០ ខែមេសា ឆ្នាំ២០២៦ ដោយបញ្ជាក់ថា លោកទំនងជានឹងមិនពន្យារពេលបទឈប់បាញ់បណ្តោះអាសន្នជាមួយអ៊ីរ៉ង់ បើការចរចាមិនដំណើរការតាមផែនការ។

បទឈប់បាញ់នេះដែលចាប់ផ្តើមពីថ្ងៃទី៨ ខែមេសា កំពុងខិតជិតដល់ថ្ងៃផុតកំណត់។ លោកត្រាំបានព្រមានថា អ៊ីរ៉ង់ត្រូវតែបោះបង់កម្មវិធីនុយក្លេអ៊ែរជាលក្ខខណ្ឌសំខាន់បំផុត។

ក្រុមមន្ត្រីជាន់ខ្ពស់អាមេរិក រួមមានអនុប្រធានាធិបតី JD Vance និងលោក Jared Kushner នឹងធ្វើដំណើរទៅប៉ាគីស្ថានសម្រាប់ការចរចាសន្តិភាពជុំទីពីរ។ លោកត្រាំបានសរសេរនៅលើ Truth Social ថា លោកមិនមានអារម្មណ៍ជាប់សម្ពាធក្នុងការចុះកិច្ចព្រមព្រៀងដែលមិនចំណេញសម្រាប់អាមេរិកឡើយ។

កងទ័ពជើងទឹកអាមេរិកនៅតែបន្តឡោមព័ទ្ធច្រកសមុទ្រហ័រមូស ហើយទើបតែស្ទាក់ចាប់នាវាដឹកទំនិញអ៊ីរ៉ង់មួយគ្រឿង។ លោកត្រាំបានលើកឡើងថា ការបិទខ្ទប់នេះធ្វើឲ្យអ៊ីរ៉ង់ខាតប្រមាណ៥០០លានដុល្លារក្នុងមួយថ្ងៃ។

លោកត្រាំបានសង្កត់ធ្ងន់ថា លោកនឹងមិនខ្លាចការចាត់វិធានការណ៍តឹងរ៉ឹងបន្ថែមទៀត ប្រសិនបើចាំបាច់ ដើម្បីការពារផលប្រយោជន៍ជាតិអាមេរិក។