គំរាមកំហែងអាកាសធាតុ៖ ថៃអាចក្ដៅដូចវាលខ្សាច់សាហារ៉ានៅឆ្នាំ២០៧០

របាយការណ៍ស្រាវជ្រាវថ្មីបង្ហាញថា ប្រទេសថៃអាចនឹងប្រឈមមុខនឹងកម្ដៅខ្លាំងដូចវាលខ្សាច់សាហារ៉ានៅឆ្នាំ២០៧០ ដោយសីតុណ្ហភាពមធ្យមប្រចាំឆ្នាំអាចហក់ឡើងលើសពី ២៩ អង្សាសេ។

យោងតាមអត្ថបទស្រាវជ្រាវ «Too Hot To Live: Climate Change In Thailand» ដែលចុះផ្សាយដោយ The Nation និង Asia News Network ការប្រែប្រួលអាកាសធាតុកំពុងធ្វើឲ្យសីតុណ្ហភាពកើនឡើងហួសពីសមត្ថភាពរស់នៅរបស់មនុស្ស។

បច្ចុប្បន្ន សីតុណ្ហភាពមធ្យមរបស់ថៃស្ថិតនៅត្រឹម ២៦ អង្សាសេ ដែលកំពុងខិតជិតទៅរកចំណុចគ្រោះថ្នាក់។ អ្នកជំនាញពន្យល់ថា ការកើនឡើងកម្ដៅនេះមិនមែនគ្រាន់តែជាថ្ងៃក្ដៅច្រើនជាងមុនទេ ប៉ុន្តែជាការផ្លាស់ប្តូរប្រព័ន្ធអាកាសធាតុទាំងមូល។

ជាក់ស្ដែង ចាប់ពីខែមីនាដល់ឧសភារៀងរាល់ឆ្នាំ ទីក្រុងជាង ៥០ កន្លែងនៅថៃហក់ឡើងកម្ដៅលើសពី ៤០ អង្សាសេ។ កាលពីឆ្នាំ ២០១៦ កម្ដៅនៅថៃធ្លាប់ហក់ឡើងដល់ ៤៤,៦ អង្សាសេ ដែលជាកំណត់ត្រាខ្ពស់បំផុត។

ក្រៅពីកម្ដៅខ្លាំង ថៃក៏កំពុងប្រឈមមុខនឹងបញ្ហាគ្រោះរាំងស្ងួត ទឹកជំនន់ញឹកញាប់ និងកម្រិតទឹកសមុទ្រឡើងខ្ពស់ដែលគំរាមកំហែងដល់តំបន់ឆ្នេរ។ បញ្ហាទាំងនេះកំពុងវាយប្រហារលើសង្គមក្នុងពេលតែមួយ ធ្វើឲ្យការសម្របខ្លួនទៅនឹងអាកាសធាតុថ្មីក្លាយជាកិច្ចការលំបាក។

សំណួរសំខាន់នៅពេលនេះគឺ តើថៃអាចរៀបចំប្រព័ន្ធទីក្រុង ថាមពល សុខាភិបាល និងគំរូសេដ្ឋកិច្ចឡើងវិញបានលឿនប៉ុណ្ណា ដើម្បីអាចបន្តរស់នៅក្នុងបរិយាកាសក្ដៅហួតហែងដូចវាលខ្សាច់នេះ?