By កងទ័ពអ៊ីស្រាអែលបានបដិសេធការវិលត្រឡប់របស់ប្រជាជនលីបង់ទៅកាន់លំនៅឋាននៅជិតតំបន់ព្រំដែន និងភូមិមួយចំនួននៅភាគខាងត្បូង ទោះបីជាមានបទឈប់បាញ់ក៏ដោយ។
នៅក្នុងការបង្ហោះមួយនៅលើបណ្តាញសង្គម X អ្នកនាំពាក្យយោធាអ៊ីស្រាអែល លោក Avichay Adraee បាននិយាយថា ជនស៊ីវិលត្រូវបាន«ហាមឃាត់មិនឲ្យធ្វើដំណើរទៅភាគខាងត្បូង»នៃខ្សែបន្ទាត់មួយដែលគ្របដណ្តប់ភូមិជាច្រើន និងតំបន់ជុំវិញ។
លោកក៏បានព្រមានប្រជាជនកុំឲ្យចូលទៅជិតទន្លេ Litani ជ្រលងភ្នំ Salhani និងតំបន់ Slouq ដោយលើកផែនទីដែលបង្ហាញពីភូមិចំនួន២១មានទីតាំងនៅក្នុងតំបន់ហាមឃាត់ រួមជាមួយនឹងភូមិជាង៥០ផ្សេងទៀត។
អ្នកនាំពាក្យយោធាបានបញ្ចាក់ថា កងកម្លាំងនៅតែរក្សាវត្តមានរបស់ខ្លួននៅភាគខាងត្បូងប្រទេសលីបង់ ដើម្បីដោះស្រាយសកម្មភាពពីក្រុមហេសបូឡា។
ចាប់តាំងពីថ្ងៃទី២ខែមីនាមក អ៊ីស្រាអែលបានធ្វើការវាយលុកនៅក្នុងប្រទេសលីបង់ ដែលបានសម្លាប់មនុស្សប្រហែល២,៣០០នាក់ របួសជាង៧,៥០០នាក់ និងបានធ្វើឲ្យមនុស្សជាង១លាននាក់ផ្លាស់ទីលំនៅ។
បទឈប់បាញ់រយៈពេល១០ថ្ងៃ ដែលសម្របសម្រួលដោយសហរដ្ឋអាមេរិកបានចូលជាធរមាន ប៉ុន្តែស្ថានភាពនៅតែផុយស្រួយ។ ហេសបូឡាបញ្ជាក់ថា ខ្លួននៅតែរក្សាសិទ្ធិក្នុងការប្រឆាំងនឹងវត្តមានយោធារបស់អ៊ីស្រាអែល។
អត្ថបទ៖ សាង ស្រីល័ក្ខ
