ត្រាំគំរាមគុយបា ប្រធានាធិបតីគុយបាប្រកាសត្រៀមខ្លួនបូជាជីវិត

ភ្ញាក់ផ្អើលពិភពលោក! ប្រធានាធិបតីអាមេរិក លោក ដូណាល់ ត្រាំ បានលើកឡើងថា សហរដ្ឋអាមេរិកអាចនឹង «ឆៀងចូលលេង» ប្រទេសគុយបា បន្ទាប់ពីបញ្ចប់សង្គ្រាមជាមួយអ៊ីរ៉ង់។ ការលើកឡើងនេះបានបង្កើតការភ័យខ្លាចថា សម្ពាធយោធាអាមេរិកអាចពង្រីកទៅតំបន់អាមេរិកឡាទីន។

នៅពេលសម្ភាសន៍ជាមួយអ្នកសារព័ត៌មាន លោកត្រាំបានរិះគន់គុយបាថាជា «ប្រទេសដែលកំពុងបរាជ័យ» និងអះអាងថា ពលរដ្ឋអាមេរិកដើមកំណើតគុយបាបានរងទុក្ខវេទនា។ ទោះជាយ៉ាងណា លោកមិនបានពន្យល់ពីអត្ថន័យពិតប្រាកដនៃពាក្យ «ឆៀងចូលលេង» នេះទេ។

ឆ្លើយតបទៅនឹងសម្តីនេះ ប្រធានាធិបតីគុយបា លោក Miguel Díaz-Canel បានបង្ហាញជំហរម៉ឺងម៉ាត់។ លោកបានព្រមានអាមេរិកកុំគិតគូរពីការប្រឈមមុខដាក់គ្នាដោយផ្ទាល់ និងបញ្ជាក់ថា ប្រសិនបើមានការឈ្លានពាន គុយបានឹងតស៊ូយ៉ាងដាច់ខាត។ លោកថែមទាំងបានអះអាងថា លោកត្រៀមខ្លួនបូជាជីវិតដើម្បីបដិវត្តន៍។

ភាពតានតឹងនេះកើតឡើងក្នុងពេលដែលអាមេរិកកំពុងជាប់ផុងក្នុងជម្លោះជាមួយអ៊ីរ៉ង់ ដោយលោកត្រាំបានបញ្ជាឲ្យបិទច្រកសមុទ្រហ័រមូស។ ប្រទេសអាមេរិកឡាទីនជាច្រើនបានបង្ហាញការព្រួយបារម្ភចំពោះស្ថានភាពនេះ។ ចំពោះប្រជាជនគុយបា ១១ លាននាក់ នេះគឺជាវិបត្តិធ្ងន់ធ្ងរបំផុតក្រោយបដិវត្តន៍ឆ្នាំ១៩៥៩។