By ខេត្តកំពង់ចាម៖ នគរបាលបានឃាត់ខ្លួនជនសង្ស័យពីរនាក់ដែលបានកាប់យុវជនវត្តម្នាក់ធ្វើឱ្យដាច់ប្រអប់ដៃឆ្វេង និងស្រាំលលាដ៏ក្បាលយ៉ាងធ្ងន់ធ្ងរ កាលពីថ្ងៃទី១២ មេសា ឆ្នាំ២០២៦។
យុវជនរងគ្រោះឈ្មោះ ខាន់ ខាត់មៈ អាយុ១៦ឆ្នាំ ជាក្មេងវត្តដែលត្រូវបានឪពុកម្ដាយបោះបង់ចោលតាំងពីអាយុ៥ឆ្នាំ ដោយសារឪពុកពិការជើងសង្ខាងគ្មានលទ្ធភាពចិញ្ចឹម។ ក្មេងប្រុសនេះបានរស់នៅក្នុងវត្តបឹងកុក ក្រុងកំពង់ចាម ហើយបានបួសជាសង្ឃរៀនធម៌ច្រើនឆ្នាំមុននឹងសឹក។
ហេតុការណ៍កាប់ប្រហារបានកើតឡើងនៅវេលាម៉ោង១យប់រំលងអធ្រាត្រ នៅចំណុចមុខផ្ទះម្នាក់ក្នុងសង្កាត់បឹងកុក។ សាក្សីបានរៀបរាប់ថា មុនពេលកើតហេតុ ជនសង្ស័យម្នាក់បានពាក់មួកហើយសុំចូលបន្ទប់ទឹក បន្ទាប់មកក៏ចេញមកកាប់យុវជនដោយមិនដឹងមូលហេតុ។
បន្ទាប់ពីកើតហេតុ យុវជនរងរបួសបានរត់គេចប្រមាណ១០ម៉ែត្រមុននឹងដួលលើផ្លូវ ហើយត្រូវបានប្រជាពលរដ្ឋជួយដឹកយកទៅសង្គ្រោះនៅមន្ទីរពេទ្យខេត្តកំពង់ចាម។
លោកវរសេនីយ៍ឯក អ៉ឹង ប៊ុន អធិការនគរបាលក្រុងកំពង់ចាម បានដឹកនាំការស្រាវជ្រាវ ហើយកម្លាំងសមត្ថកិច្ចបានចាប់បានជនសង្ស័យទាំងពីរនាក់នៅថ្ងៃទី១៣ មេសា។
ជនសង្ស័យដែលត្រូវបានចាប់ខ្លួនគឺ ផាន់ គឹមសួរ អាយុ១៩ឆ្នាំ និង ប៉ោ ណូគា អាយុ១៩ឆ្នាំ។ ពួកគេបានឆ្លើយសារភាពថា ការកាប់ប្រហារកើតឡើងដោយសារជម្លោះពាក្យសំដី និងការថតរូបម៉ូតូស្រីស្នេហ៍របស់ពួកគេ។
បច្ចុប្បន្ន យុវជនរងគ្រោះកំពុងសម្រាកព្យាបាលរបួសនៅមន្ទីរពេទ្យខេត្តកំពង់ចាម ខណៈជនសង្ស័យត្រូវបានឃាត់ខ្លួនដើម្បីធ្វើការស៊ើបអង្កេតបន្ថែម។
