ចិន-តួកម៉េនីស្ថាន ពង្រឹងសម្ព័ន្ធភាពយុទ្ធសាស្ត្រ និងសហប្រតិបត្តិការឧស្ម័នធម្មជាតិ

អាសហ្កាបាត – នៅថ្ងៃទី១៦ មេសា លោក Ding Xuexiang ឧបនាយករដ្ឋមន្ត្រីចិន បានជួបពិភាក្សាយុទ្ធសាស្ត្រជាមួយលោក Serdar Berdimuhamedov ប្រធានាធិបតីតួកម៉េនីស្ថាន នៅទីក្រុងអាសហ្កាបាត ដើម្បីពង្រឹងទំនាក់ទំនងទ្វេភាគី។

លោក Ding Xuexiang បានថ្លែងថា ប្រធានរដ្ឋចិនលោក Xi Jinping បានជួបសន្ទនាចំនួនពីរលើកជាមួយលោកប្រធានាធិបតីកាលពីឆ្នាំមុន ដែលបានកំណត់ផែនការគោលថ្មីសម្រាប់ការអភិវឌ្ឍទំនាក់ទំនងទ្វេភាគី។ ប្រទេសចិននឹងធ្វើជាដៃគូដ៏គួរឱ្យទុកចិត្តបានរបស់ប្រទេសតួកម៉េនីស្ថានជានិច្ច។

“ផែនការប្រាំឆ្នាំទី១៥ របស់ប្រទេសចិននឹងនាំមកនូវកាលានុវត្តភាពកាន់តែច្រើនដល់ប្រទេសនានាជុំវិញពិភពលោក ក៏បូករួមទាំងប្រទេសតួកម៉េនីស្ថានផងដែរ។” លោក Ding បានបញ្ជាក់។

ប្រទេសចិនមានឆន្ទៈធ្វើការជាមួយប្រទេសតួកម៉េនីស្ថាន ដើម្បីស្វែងរកការអភិវឌ្ឍ និងវិបុលភាពរួមដោយផ្អែកលើគោលការណ៍នៃការផ្តល់ផលប្រយោជន៍ទៅវិញទៅមក និងឈ្នះ-ឈ្នះ។ ភាគីទាំងពីរគួរតែពង្រឹងកិច្ចសហប្រតិបត្តិការក្នុងវិស័យឧស្ម័នធម្មជាតិ ស្វែងរកកិច្ចសហប្រតិបត្តិការថ្មីក្នុងវិស័យដូចជាសេដ្ឋកិច្ច ពាណិជ្ជកម្ម និងវិនិយោគ និងនវានុវត្តន៍ផ្នែកបច្ចេកវិទ្យាជាដើម។

ជាការឆ្លើយតប លោក Berdimuhamedov បានបញ្ជាក់ថា ភាគីតួកម៉េនីស្ថានសូមកោតសរសើរយ៉ាងស្មោះ ចំពោះសមិទ្ធផលអភិវឌ្ឍន៍របស់ប្រទេសចិន ហើយមានឆន្ទៈធ្វើការជាមួយប្រទេសចិន ដើម្បីជំរុញយ៉ាងសកម្មនូវគំនិតឯកភាពរួមរបស់ភាគីទាំងពីរ។

“ភាគីតួកម៉េនីស្ថានវាយតម្លៃខ្ពស់ចំពោះគំនិតផ្តួចផ្តើមសកលទាំងបួនដែលលើកឡើងដោយប្រធានរដ្ឋចិនលោក Xi Jinping ហើយសូមគាំទ្រយ៉ាងមុតមាំចំពោះប្រទេសចិនដែលធ្វើជាម្ចាស់ផ្ទះនៃកិច្ចប្រជុំកំពូលចិន-អាស៊ីកណ្តាលលើកទីបីនៅឆ្នាំ២០២៧។” លោកប្រធានាធិបតីបានបន្ថែម។

កិច្ចប្រជុំនេះបានសម្រេចចិត្តពង្រឹងកិច្ចសហប្រតិបត្តិការផ្នែកឧស្ម័នធម្មជាតិជាអាទិភាព និងពង្រឹងកិច្ចសហប្រតិបត្តិការជាក់ស្តែងរវាងប្រទេសទាំងពីរ។

ប្រភព ៖ (CCFR)