By ឧស្សាហកម្មប្រេងពិភពលោកបានខាតបង់ប្រាក់ចំណូលជិត ៥០ ប៊ីលានដុល្លារ ដោយសារការរាំងស្ទះផលិតកម្មចាប់តាំងពីជម្លោះអ៊ីរ៉ង់ផ្ទុះឡើងមុនរយៈពេល ៥០ ថ្ងៃ។ ផលប៉ះពាល់នេះរំពឹងថានឹងបន្តរយៈពេលច្រើនខែ ឬច្រើនឆ្នាំទៀត។
យោងតាមការគណនារបស់ក្រុមហ៊ុនទិន្នន័យអន្តរជាតិ Kpler និងទីភ្នាក់ងារសារព័ត៌មានរ៉យទ័រ ចាប់តាំងពីចុងខែកុម្ភៈមក ប្រេងឆៅ និងឧស្ម័នជាង ៥០០ លានបារ៉ែល ត្រូវបានបាត់ចេញពីទីផ្សារពិភពលោក។ នេះជាការរំខានផ្នែកផ្គត់ផ្គង់ថាមពលដ៏ធំបំផុតមួយក្នុងប្រវត្តិសាស្រ្តសម័យទំនើប។
លោក Johannes Rauball មន្រ្តីវិភាគប្រេងឆៅជាន់ខ្ពស់នៅ Kpler បានបញ្ជាក់ថា៖ “ដោយតម្លៃប្រេងជាមធ្យមប្រហែល ១០០ ដុល្លារ/បារ៉ែល បរិមាណផលិតកម្មប្រេងដែលបាត់នោះ បើគិតជាប្រាក់ចំណូលទៅ គឺមានប្រហែល ៥០ ប៊ីលានដុល្លារ។”
តួលេខនេះស្មើនឹងប្រហែល ១% នៃផលិតផលក្នុងស្រុកសរុប (GDP) របស់អាល្លឺម៉ង់ ឬទិន្នផលប្រចាំឆ្នាំទាំងមូលរបស់សេដ្ឋកិច្ចតូចៗដូចជាឡាតវី ឬអេស្តូនី។ ការបាត់ប្រេង ៥០០ លានបារ៉ែល ស្មើនឹងតម្រូវការប្រេងសម្រាប់វិស័យអាកាសចរណ៍អន្តរជាតិរយៈពេល ១០ សប្ដាហ៍ ឬការប្រើប្រាស់ប្រេងពិភពលោករយៈពេល ៥ ថ្ងៃ។
ទិន្នន័យរបស់ Kpler បានបង្ហាញថា គិតតែក្នុងខែមីនា បណ្ដាប្រទេសនៅឈូងសមុទ្រពែរ្ស បានខកខានមិនបូមប្រេងប្រហែល ៨ លានបារ៉ែល/ថ្ងៃ។ បរិមាណនេះស្មើនឹងផលិតកម្មរបស់ក្រុមហ៊ុនយក្សអាមេរិក Exxon Mobil និង Chevron រួមបញ្ចូលគ្នា។
ការនាំចេញប្រេងឥន្ធនៈយន្តហោះពីប្រទេសអារ៉ាប៊ីសាអូឌីត កាតា អារ៉ាប់រួម គុយវ៉ែត បារ៉ែន និងអូម៉ង់បានធ្លាក់ចុះយ៉ាងខ្លាំង ពីប្រហែល ១៩,៦ លានបារ៉ែលក្នុងខែកុម្ភៈ មកត្រឹម ៤,១ លានបារ៉ែលក្នុងខែមីនា និងដើមខែមេសា។
ការរាយការណ៍នេះធ្វើឡើងក្រោយពីអ៊ីរ៉ង់បានប្រកាសពីការបើកច្រកសមុទ្រហ័រមូហ្សសម្រាប់កប៉ាល់ពាណិជ្ជកម្ម ខណៈដែលប្រធានាធិបតីសហរដ្ឋអាមេរិកលោកដូណាល់ត្រាំបានអះអាងថា អាមេរិកនិងអ៊ីរ៉ង់នឹងសម្រេចបានកិច្ចព្រមព្រៀងសន្តិភាពទូលំទូលាយឆាប់ៗនេះ។
