By ប្រធានាធិបតីអាមេរិក ដូណាល់ ត្រាំ បានប្រកាសពីផែនការបញ្ជូនគ្រឿងចក្រធុនធំច្រើនគ្រឿងទៅក្នុងប្រទេសអ៊ីរ៉ង់ ដើម្បីកាយយកសារធាតុអ៊ុយរ៉ាញ៉ូមដែលចម្រាញ់រួច និងបញ្ជូនវាមកកាន់សហរដ្ឋអាមេរិក។
ក្នុងព្រឹត្តិការណ៍ Turning Point USA នៅទីក្រុង Phoenix រដ្ឋ Arizona កាលពីថ្ងៃសុក្រទី១៧ ខែមេសា ឆ្នាំ២០២៦ លោកត្រាំបានថ្លែងយ៉ាងច្បាស់ថា៖ “យើងនឹងបញ្ជូនគ្រឿងចក្រធំៗចូលទៅក្នុងអ៊ីរ៉ង់ ដើម្បីកាយយកអ៊ុយរ៉ាញ៉ូមដែលចម្រាញ់រួច ហើយបញ្ជូនវាមកកាន់សហរដ្ឋអាមេរិក។”
លោកបន្ថែមថា អាមេរិកនឹងធ្វើការជាមួយអ៊ីរ៉ង់ក្រោមក្របខណ្ឌនៃកិច្ចព្រមព្រៀងសន្តិភាពនាពេលអនាគត។ ការប្រកាសនេះមកបន្ទាប់ពីអ៊ីរ៉ង់បានអះអាងថា នឹងមិនផ្ទេរឃ្លាំងស្តុកអ៊ុយរ៉ាញ៉ូមរបស់ខ្លួនទៅណាឡើយ។
មុននេះ លោកត្រាំបានបង្ហាញពីទំនុកចិត្តថា កិច្ចព្រមព្រៀងសន្តិភាពរវាងអាមេរិកនិងអ៊ីរ៉ង់កាន់តែខិតជិតមកដល់ ដោយអ៊ីរ៉ង់បានយល់ព្រមប្រគល់សារធាតុអ៊ុយរ៉ាញ៉ូមដែលបានចម្រាញ់រួច (ឬហៅថា «ធូលីនុយក្លេអ៊ែរ») មកឲ្យអាមេរិកវិញ។
ចំណុចខ្វែងគំនិតសំខាន់នៅតែមាននៅពេលអនាគតនៃកម្មវិធីនុយក្លេអ៊ែរអ៊ីរ៉ង់។ អាមេរិកចង់ឲ្យអ៊ីរ៉ង់ឈប់ចម្រាញ់អ៊ុយរ៉ាញ៉ូមរហូតដល់២០ឆ្នាំ ខណៈអ៊ីរ៉ង់សុំត្រឹមតែ៥ឆ្នាំប៉ុណ្ណោះ។
អ៊ីរ៉ង់នៅតែអះអាងថា កម្មវិធីរបស់ខ្លួនគឺសម្រាប់សន្តិភាពនិងថាមពលស៊ីវិល។ បច្ចុប្បន្ន អ៊ីរ៉ង់មានសារធាតុអ៊ុយរ៉ាញ៉ូមកម្រិតខ្ពស់ប្រហែល៤០០គីឡូក្រាម ដែលអាចយកទៅធ្វើជាអាវុធបានយ៉ាងងាយ។
អត្ថបទ៖ សុខ សុវណ្ណ
