ម៉ាឡេស៊ីអះអាងច្រកម៉ាឡាកាមិនដូចហ័រមូហ្ស ដោយសារភាពខុសគ្នានៃស្ថានភាពភូមិសាស្ត្រនយោបាយ

ម៉ាឡេស៊ីបានច្រានចោលក្ដីបារម្ភថា ច្រកសមុទ្រម៉ាឡាកាអាចធ្លាក់ចូលទៅក្នុងស្ថានភាពដូចច្រកសមុទ្រហ័រមូហ្ស ដោយសង្កត់ធ្ងន់លើភាពខុសគ្នានៃស្ថានភាពភូមិសាស្ត្រនយោបាយរវាងតំបន់ទាំងពីរ។

រដ្ឋមន្ត្រីក្រសួងការពារជាតិម៉ាឡេស៊ី លោក Mohamed Khaled Nordin បានថ្លែងកាលពីថ្ងៃអាទិត្យ (១៩ មេសា) នៅពិព័រណ៍សេវាកម្មការពារជាតិអាស៊ី និងសន្តិសុខជាតិអាស៊ី ២០២៦ ថា៖ «អ្វីដែលបានកើតឡើងនៅហ័រមូហ្ស មិនមែនជាអ្វីដែលត្រូវយកតម្រាប់តាមនោះទេ។ យើងនឹងព្យាយាមតាមដែលអាចធ្វើទៅបាន ដើម្បីធានាថា វាមិនកើតឡើងនៅច្រកសមុទ្រម៉ាឡាកាទេ»។

ច្រកសមុទ្រម៉ាឡាកា ដែលជាផ្លូវដឹកជញ្ជូនដ៏មមាញឹកបំផុតមួយរបស់ពិភពលោក ស្ថិតនៅក្រោមការគ្រប់គ្រងរួមគ្នារបស់ម៉ាឡេស៊ី ឥណ្ឌូនេស៊ី និងសិង្ហបុរី។ លោក Khaled បានពន្យល់ថា ជំហររបស់អ៊ីរ៉ង់នៅច្រកសមុទ្រហ័រមូហ្សកើតចេញពីទណ្ឌកម្មអន្តរជាតិយូរអង្វែង និងភាពតានតឹងជាមួយសហរដ្ឋអាមេរិក ដែលជាកត្តាមិនមាននៅអាស៊ីអាគ្នេយ៍។

«ប្រទេសទាំង ៣ គាំទ្រយ៉ាងមុតមាំនូវគោលការណ៍របស់អង្គការសហប្រជាជាតិ រួមទាំងលំហូរពាណិជ្ជកម្មដោយសេរី និងសេរីភាពនៃការធ្វើនាវាចរណ៍នៅក្នុងតំបន់» លោកបានបន្ថែម។

ស្ថិរភាពនៅច្រកសមុទ្រម៉ាឡាកាគឺជាលទ្ធផលនៃការសម្របសម្រួលយូរអង្វែងក្នុងចំណោមប្រទេសទាំង៣ ដែលរួមគ្នាគ្រប់គ្រងផ្លូវសមុទ្រដ៏មមាញឹកបំផុតមួយរបស់ពិភពលោក។