By អ៊ីស្រាអែលជាមួយសម្ព័ន្ធមិត្តអាមេរិកកំពុងត្រៀមខ្លួនវាយប្រហាររោងចក្រថាមពលដ៏សំខាន់របស់អ៊ីរ៉ង់ ប្រសិនបើកិច្ចចរចាសន្តិភាពរវាងវ៉ាស៊ីនតោន-តេហេរ៉ង់បរាជ័យ។ ព័ត៌មាននេះត្រូវបានផ្សាយដោយទីភ្នាក់ងារព័ត៌មានតួកគី Anadolu នៅថ្ងៃទី១៩ ខែមេសា ឆ្នាំ២០២៦។
មន្ត្រីយោធាជាន់ខ្ពស់អ៊ីស្រាអែលម្នាក់ដែលសុំមិនបញ្ចេញឈ្មោះបានបញ្ជាក់ថា៖ «មានការសម្របសម្រួលយ៉ាងជិតស្និទ្ធរវាងភាគីទាំងពីរ ហើយប្រសិនបើការប្រយុទ្ធគ្នាបន្តកើតឡើងវិញ គោលដៅទាំងនោះក៏នឹងរួមបញ្ចូលរោងចក្រថាមពលអ៊ីរ៉ង់ផងដែរ»។
អ៊ីរ៉ង់បន្តរក្សាគោលជំហររឹងមាំទាក់ទងនឹងសិទ្ធិចម្រាញ់អ៊ុយរ៉ាញ៉ូម និងមិនមានសុទិដ្ឋិនិយមចំពោះកិច្ចចរចាជាមួយអាមេរិក។
គួររំលឹកថា នៅថ្ងៃទី២៨ កុម្ភៈ អាមេរិកនិងអ៊ីស្រាអែលបានចាប់ផ្ដើមការវាយលុករួមគ្នាលើអ៊ីរ៉ង់ ដោយបណ្ដាលឱ្យមានអ្នកស្លាប់ជាង៣,៣០០នាក់។ សង្គ្រាមនេះត្រូវបានបញ្ឈប់ដោយបទឈប់បាញ់រយៈពេលពីរសប្ដាហ៍ដែលប៉ាគីស្ថានជាអ្នកសម្របសម្រួល។
ទីក្រុងវ៉ាស៊ីនតោននិងទីក្រុងតេហេរ៉ង់បានធ្វើកិច្ចចរចាផ្ទាល់នៅប៉ាគីស្ថានកាលពីចុងសប្ដាហ៍មុន ប៉ុន្ដែបញ្ចប់ដោយគ្មានលទ្ធផល។ អ្នកសម្របសម្រួលកំពុងស្វែងរកការពិភាក្សាជុំថ្មីនៅទីក្រុងអ៊ីស្លាម៉ាបាដ។
ប្រធានសភាអ៊ីរ៉ង់លោក Mohammad Bagher Qalibaf បានលើកឡើងថា ភាពខុសគ្នាសំខាន់ៗនៅតែមានរវាងទីក្រុងតេហេរ៉ង់និងទីក្រុងវ៉ាស៊ីនតោន ទោះបីជាមានវឌ្ឍនភាពក្នុងការចរចាក៏ដោយ។
