រុស្ស៊ី-កូរ៉េខាងជើង បន្តពង្រឹងសហប្រតិបត្តិការ ក្នុងវិស័យអនុវត្តច្បាប់

ភ្នំពេញ៖ រដ្ឋមន្រ្តីមហាផ្ទៃរុស្ស៊ី លោក Vladimir Kolokoltsev បានធ្វើដំណើរទៅកាន់ប្រទេសកូរ៉េខាងជើង កាលពីថ្ងៃអង្គារ ទី២១ ខែមេសា ឆ្នាំ២០២៦ ដើម្បីពិភាក្សាអំពីការពង្រឹងកិច្ចសហប្រតិបត្តិការទ្វេភាគីរវាងប្រទេសសម្ព័ន្ធមិត្តទាំងពីរ។

តាមការបញ្ជាក់ពីអ្នកនាំពាក្យក្រសួងមហាផ្ទៃរុស្ស៊ី លោកស្រី Irina Volk តាមរយៈបណ្តាញតេឡេក្រាម បានបង្ហាញថា៖ «កិច្ចសហប្រតិបត្តិការក្នុងវិស័យអនុវត្តច្បាប់នៃប្រទេសទាំងពីរ នឹងត្រូវលើកយកមកពិចារណា» ដោយបានភ្ជាប់រូបភាពរដ្ឋមន្រ្តី Kolokoltsev កំពុងស្ថិតនៅទីក្រុងព្យុងយ៉ាង។

ទំនាក់ទំនងរវាងរុស្ស៊ី និងកូរ៉េខាងជើង បានខិតខំប្រឹងប្រែងខ្លាំងក្លាឡើង ចាប់តាំងពីរុស្ស៊ីចូលឈ្លានពានអ៊ុយក្រែននៅឆ្នាំ២០២២។ ការអភិវឌ្ឍនេះបានឈានដល់កម្រិតថ្មីនៅឆ្នាំ២០២៤ នៅពេលដែលប្រធានាធិបតីរុស្ស៊ីលោកពូទីន បានធ្វើទស្សនកិច្ចទៅកាន់ទីក្រុងព្យុងយ៉ាង ហើយបានចុះសន្ធិសញ្ញាភាពជាដៃគូយុទ្ធសាស្រ្តគ្រប់ជ្រុងជ្រោយ។

សន្ធិសញ្ញាដ៏សំខាន់នេះមិនត្រឹមតែពង្រឹងទំនាក់ទំនងយុទ្ធសាស្រ្តប៉ុណ្ណោះទេ ថែមទាំងរួមបញ្ចូលនូវការធានាការពារគ្នាទៅវិញទៅមកផងដែរ។ ការទៅដល់របស់រដ្ឋមន្រ្តីមហាផ្ទៃរុស្ស៊ីនៅពេលនេះ ត្រូវបានចាត់ទុកថាជាជំហានសំខាន់មួយទៀតក្នុងការពង្រឹងសហប្រតិបត្តិការរវាងប្រទេសទាំងពីរ។

ការពិភាក្សានាពេលខាងមុខនឹងផ្តោតលើការពង្រឹងសហប្រតិបត្តិការក្នុងវិស័យអនុវត្តច្បាប់ ដែលអាចរួមមានការផ្លាស់ប្តូរព័ត៌មាន ការបណ្តុះបណ្តាល និងការសហការក្នុងការប្រយុទ្ធប្រឆាំងនឹងឧក្រិដ្ឋកម្មអន្តរជាតិ។