By ភ្នំពេញ៖ លោក ទេព អស្នារិទ្ធ អ្នកនាំពាក្យក្រសួងព័ត៌មានកម្ពុជា បានចេញសារសម្តែងការសោកស្តាយយ៉ាងខ្លាំងចំពោះការផ្សាយរបស់ Wall Street Journal (WSJ) ដែលបានប្រើពាក្យ “Scambodia” ក្នុងអត្ថបទរបស់ខ្លួន។ ទង្វើនេះត្រូវបានចាត់ទុកថាជាការរើសអើង និងខ្វះវិជ្ជាជីវៈ។
លោក ទេព អស្នារិទ្ធ បានគូសបញ្ជាក់ថា ការយកឈ្មោះប្រទេសដែលមានអធិបតេយ្យភាពមកភ្ជាប់ជាមួយបញ្ហាឧក្រិដ្ឋកម្មសកលលោក គឺមានចេតនាធ្វើឱ្យមានការរើសអើង។ “ឈ្មោះប្រទេសគឺជាអត្តសញ្ញាណ និងមោទនភាពរបស់ប្រជាជាតិ” លោកបានថ្លែង។
ក្រសួងព័ត៌មានបានរៀបចំផ្ញើលិខិតទៅកាន់និពន្ធនាយក និងអ្នកគ្រប់គ្រង WSJ ដើម្បីពិនិត្យឡើងវិញនូវខ្លឹមសារ និងធ្វើការកែតម្រូវ។ លោកអ្នកនាំពាក្យបានចាត់ទុកការផ្សាយនេះថាជាសំណេរបែបបន្តុះបង្អាប់ និងប្រើការសន្មត់ជាជាងការផ្តល់អង្គហេតុពិត។
ទាក់ទងនឹងបញ្ហា Online Scams លោក ទេព អស្នារិទ្ធ បានបញ្ជាក់ពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការបោសសម្អាតរាល់ទម្រង់នៃបទល្មើស។ ចាប់ពីខែកក្កដា ២០២៥ ដល់ពាក់កណ្តាលខែមេសា ២០២៦ សមត្ថកិច្ចបានបង្ក្រាប Online Scams ជាង ២៥០ ករណី។
សមត្ថកិច្ចកម្ពុជាក៏បានអនុវត្តនីតិវិធីបណ្តេញជនបរទេសពាក់ព័ន្ធនឹងការឆបោកអនឡាញសរុបចំនួន ១៣,០៣៩ នាក់ ក្នុងនោះមានស្ត្រី ១,៥០៩ នាក់ ពី ៣៣ សញ្ជាតិ។
លោក ទេព អស្នារិទ្ធ បានសង្កត់ធ្ងន់ថា ភារកិច្ចរបស់សារព័ត៌មានគឺផ្តល់ព័ត៌មានត្រឹមត្រូវ និងបង្ហាញការពិត ដើម្បីស្ថាបនា មិនមែនដើម្បីបំផ្លាញសេចក្តីថ្លៃថ្នូររបស់ប្រជាជាតិណាមួយឡើយ។
