កម្ពុជា-កូរ៉េ ពង្រឹងសហប្រតិបត្តិការវិស័យការងារ និងអភិវឌ្ឍធនធានមនុស្ស

ភ្នំពេញ៖ លោក ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានជួបពិភាក្សាការងារជាមួយលោក គីម ឆាងយ៉ុង ឯកអគ្គរដ្ឋទូតថ្មីនៃសាធារណរដ្ឋកូរ៉េប្រចាំកម្ពុជា នៅទីស្តីការក្រសួង នាព្រឹកថ្ងៃទី២១ មេសា ២០២៦។កិច្ចពិភាក្សាបានផ្តោតលើការលើកកម្ពស់សិទ្ធិពលករ ការអភិវឌ្ឍធនធានមនុស្ស ការបញ្ជូនកម្លាំងពលកម្ម និងការបង្កើតបរិយាកាសវិនិយោគប្រសើរ។ លោករដ្ឋមន្ត្រីបានស្វាគមន៍យ៉ាងកក់ក្តៅចំពោះឯកអគ្គរដ្ឋទូតថ្មី និងថ្លែងអំណរគុណចំពោះកូរ៉េដែលតែងតែផ្តល់កូតាទទួលយកពលករខ្មែរ។ការបើកឱកាសនេះបានធ្វើឱ្យកូរ៉េក្លាយជាក្តីស្រមៃរបស់ពលរដ្ឋកម្ពុជា ដោយសារថៅកែមានចិត្តល្អ ប្រាក់ឈ្នួលខ្ពស់ និងអាចត្រឡប់មកវិញជាមួយជំនាញច្បាស់លាស់។ លោកបានគូសបញ្ជាក់ពីទំនាក់ទំនងរឹងមាំ និងការរួមចំណែកសំខាន់របស់កូរ៉េក្នុងការអភិវឌ្ឍនៅកម្ពុជា។ជាក់ស្តែង កាលពីថ្ងៃទី២០ មេសា ក្រសួងការងារ និង KOICA បានចុះហត្ថលេខាលើកំណត់ហេតុស្តីពី “គម្រោងអភិវឌ្ឍកម្លាំងពលកម្មជំនាញ ដើម្បីឆ្លើយតបតម្រូវការឧស្សាហកម្មនៅកម្ពុជា”។លោករដ្ឋមន្ត្រីក៏បានលើកឡើងពីការខិតខំរួមគ្នារវាងក្រសួងការងារ និងក្រសួងមហាផ្ទៃក្នុងការពង្រឹងយន្តការទប់ស្កាត់បទល្មើសអនឡាញ និងការរឹតបន្តឹងការចេញបណ្ណការងារដល់ជនបរទេស។លោក គីម ឆាងយ៉ុង បានប្រសាសន៍ថា មានកិត្តិយសនិងក្តីរីករាយក្នុងបេសកកម្មការទូតនៅកម្ពុជា ដែលទំនាក់ទំនងរវាងប្រទេសទាំងពីរនឹងឈានដល់ខួប៣០ឆ្នាំនៅឆ្នាំ២០២៧។លោកក៏បានវាយតម្លៃខ្ពស់ចំពោះចក្ខុវិស័យវែងឆ្ងាយរបស់រាជរដ្ឋាភិបាលកម្ពុជា និងក្រសួងការងារ ដែលកំពុងអនុវត្តយុទ្ធសាស្ត្របញ្ចកោណ-ដំណាក់កាលទី១។លោកឯកអគ្គរដ្ឋទូតបានថ្លែងអំណរគុណចំពោះរាជរដ្ឋាភិបាលកម្ពុជា និងលោក ហេង សួរ ដែលបានយកចិត្តទុកដាក់ខ្ពស់ចំពោះអ្នកវិនិយោគ និងពលរដ្ឋកូរ៉េនៅកម្ពុជា។ ភាគីទាំងពីរបានសម្តែងក្តីសោមនស្សរីករាយ និងប្តេជ្ញាចិត្តថា នឹងខិតខំបំពេញការងារឱ្យអស់ពីលទ្ធភាព ដើម្បីបន្តពង្រឹងនិងពង្រីកកិច្ចសហប្រតិបត្តិការទ្វេភាគីឱ្យកាន់តែជិតស្និទ្ធ។ ដោយ៖តារា