By ភ្នំពេញ៖ រថយន្តម៉ាក Ford Ranger មួយគ្រឿងបានបើកគៀរម៉ូតូមួយគ្រឿង ដែលជិះដោយបុរសម្នាក់ បណ្តាលឲ្យរងរបួស ខណៈរថយន្តបង្កបានបើកគេចខ្លួនបាត់ស្រមោល ក្រោយបង្កហេតុការណ៍ដ៏រន្ធត់នេះ។
ហេតុការណ៍នេះបានកើតឡើងកាលពី វេលាម៉ោង ២០ និង ០១ នាទី ថ្ងៃទី ២៣ ខែ មេសា ឆ្នាំ ២០២៦ នៅតាមបណ្តោយផ្លូវជាតិលេខ ៤ ភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ។
ជនរងគ្រោះមានឈ្មោះ ឈឿន គីមហៀង ភេទប្រុស អាយុ ៤១ ឆ្នាំ រងរបួសពកក្បាលផ្នែកខាងក្រោយ មានអាសយដ្ឋាននៅ ភូមិស្រែចក ឃុំព្រៃស្លឹក ស្រុកទ្រាំង ខេត្តតាកែវ។
តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញបុរសរងគ្រោះជិះម៉ូតូហុងដា មានបំពាក់ក្បាលសម្រាប់អូសរ៉ឺម៉ក ពណ៌ខ្មៅ ពាក់ស្លាកលេខ តាកែវ 1J 5932 ធ្វើដំណើរតាមបណ្តោយផ្លូវជាតិលេខ ៤ ក្នុងទិសដៅពីលិចទៅកើត។
លុះមកដល់ចំណុចកើតហេតុ ស្រាប់តែមានរថយន្តម៉ាក Ford Ranger ពណ៌ស ធ្វើដំណើរមកពីក្រោយ រួចបើកគៀរបណ្តាលឲ្យដួលរងរបួស ភ្លាមនោះរថយន្តបង្កបានបើកគេចខ្លួនបាត់។
ក្រោយកើតហេតុ ក្រុមសង្គ្រោះរបស់អង្គភាព ៧១១ កងពលតូចលេខ ៧០ បានចុះទៅដល់ទីតាំងកន្លែងកើតហេតុភ្លាមៗ ដើម្បីសង្គ្រោះ តែជនរងគ្រោះបានសុំត្រឹមតែឲ្យជួយត្រួតពិនិត្យរាងកាយរួចរាល់ ទើបគាត់សុំត្រឡប់ទៅផ្ទះវិញដោយខ្លួនឯង។
បច្ចុប្បន្ន សមត្ថកិច្ចកំពុងស្រាវជ្រាវរករថយន្ត Ford Ranger ពណ៌ស ដែលបើកគេចខ្លួននេះ ដើម្បីចាត់ការតាមច្បាប់។
ដោយ៖ សុខាសែនជ័យ
