​​🔥 អគ្គិភ័យឆាបឆេះឃ្លាំងស្តុកស្នោ ផ្អើលសមត្ថកិច្ចដឹករថយន្តទឹករាប់គ្រឿងចូលពន្លត់

ភ្នំពេញ៖ ឃ្លាំងស្តុកទុកនិងកែច្នៃស្នោមួយកន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅ បង្កការភ្ញាក់ផ្អើលដល់ប្រជាពលរដ្ឋក្បែរខាង ព្រមទាំងកម្លាំងសមត្ថកិច្ចជំនាញ ដែលបានបញ្ចេញរថយន្តទឹកជាច្រើនគ្រឿងទៅជួយបាញ់ពន្លត់ទាន់ពេលវេលា។

ហេតុការណ៍នេះបានកើតឡើងកាលពីវេលាម៉ោង ២:៤៥ នាទីរំលងអធ្រាត្រ ឈានចូលថ្ងៃទី១២ ខែឧសភា ឆ្នាំ២០២៦ ស្ថិតនៅតាមបណ្តោយផ្លូវជាតិលេខ១ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។

បើតាមសម្តីម្ចាស់ឃ្លាំងបានឲ្យដឹងថា នៅពេលពួកគាត់កំពុងតែសម្រាន្តលង់លក់ ស្រាប់តែមានអណ្តាតភ្លើងឆាបឆេះនៅក្នុងឃ្លាំងស្តុកស្នោនោះយ៉ាងសន្ធោសន្ធៅ។ ឃើញដូច្នេះ ពួកគាត់ក៏បាននាំគ្នាទាញទុយោទឹកបាញ់ទប់ស្កាត់ជាបណ្តោះអាសន្ន រួចទាក់ទងទៅមន្ត្រីជំនាញសុំឲ្យមកជួយអន្តរាគមន៍ភ្លាមៗ។

ក្រោយកម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញទទួលបានដំណឹង ក៏ចេញរថយន្តទឹកជាច្រើនគ្រឿងទៅជួយបាញ់ពន្លត់ភ្លាមៗ។ ក្រោយពេលប្រតិបត្តិការពន្លត់ត្រូវបានបញ្ចប់ ឃើញថាប្រើប្រាស់រថយន្តទឹកអស់ជាច្រើនគ្រឿង ប៉ុន្តែមិនមានអ្នករងរបួសនោះទេ ពោលគឺខូចខាតតែសម្ភារៈក្នុងឃ្លាំងមួយចំនួនធំតែប៉ុណ្ណោះ។ ការពន្លត់ត្រូវបានបញ្ចប់នៅយប់ថ្ងៃខែដដែល។

ចំពោះមូលហេតុនៃការឆេះ កម្លាំងជំនាញនឹងធ្វើការស្រាវជ្រាវបន្ថែមនៅពេលក្រោយ៕

ដោយ៖ ភារ៉ា ដង្កោ