By ភ្នំពេញ៖ នៅព្រឹកថ្ងៃទី១២ ខែឧសភា ឆ្នាំ២០២៦នេះ រដ្ឋសភាកម្ពុជា បានបោះឆ្នោតអនុម័តជាផ្លូវការលើសេចក្តីព្រាងច្បាប់ស្តីពីកាតព្វកិច្ចយោធា ដោយទទួលបានការគាំទ្រពីសមាជិកសភាទាំងអស់ ពោលគឺ ១១៤ លើ ១១៤ សំឡេង គ្មានសំឡេងជំទាស់ និងគ្មានអ្នកអវត្តមាន។
ក្រោយការអនុម័ត សេចក្តីព្រាងច្បាប់នេះ នឹងត្រូវបញ្ជូនបន្តទៅព្រឹទ្ធសភាជាតិ ដើម្បីពិភាក្សា និងអនុម័តជាបន្តបន្ទាប់ មុននឹងចូលជាធរមាន។
សេចក្តីព្រាងច្បាប់ស្តីពី «កាតព្វកិច្ចយោធា» មានរចនាសម្ព័ន្ធ ៨ជំពូក និង ២០មាត្រា ដែលត្រូវបានរាជរដ្ឋាភិបាលកម្ពុជា ពិនិត្យកែសម្រួលខ្លឹមសារសំខាន់ៗមួយចំនួន។ ក្នុងនោះ រយៈពេលបំពេញកាតព្វកិច្ចយោធាត្រូវបានកែសម្រួលពី ១៨ខែ ទៅ ២៤ខែវិញ ដើម្បីឲ្យស្របតាមស្តង់ដារអន្តរជាតិដែលអនុវត្តនៅតាមបណ្តាប្រទេសជាច្រើន។
យោងតាមសេចក្តីព្រាងច្បាប់ ប្រជាពលរដ្ឋខ្មែរទាំងពីរភេទ ដែលមានអាយុចន្លោះពី ១៨ឆ្នាំ ដល់ ២៥ឆ្នាំ ត្រូវតែបំពេញកាតព្វកិច្ចយោធា។ ទោះជាយ៉ាងណា សម្រាប់ស្ត្រី ការបំពេញកាតព្វកិច្ចយោធាគឺផ្អែកលើការស្ម័គ្រចិត្ត។
តាមគម្រោង ច្បាប់នេះនឹងចាប់ផ្ដើមអនុវត្តជាផ្លូវការនៅឆ្នាំ ២០២៦នេះ ដោយការចុះឈ្មោះនឹងចាប់ផ្ដើមពីយុវជនដែលមានអាយុ ១៧ឆ្នាំ។ ចំពោះបុគ្គលដែលមិនជាប់កាតព្វកិច្ចយោធា រួមមាន ព្រះសង្ឃ បុព្វជិតសាសនាផ្សេងៗ ប្រជាពលរដ្ឋដែលមានទេពកោសល្យពិសេស (អ្នកប្រាជ្ញ) និងអ្នកដែលមិនមានកាយសម្បទាគ្រប់គ្រាន់។
រាជរដ្ឋាភិបាលកម្ពុជា បានគូសបញ្ជាក់ថា ការកែសម្រួលច្បាប់ថ្មីនេះ នឹងជួយសម្រួលដល់ការជ្រើសរើសកងទ័ព ដែលអាចជ្រើសរើសចេញពីក្នុងចំណោមអ្នកដែលចូលបំពេញកាតព្វកិច្ចយោធា។ ចំណែកអ្នកដែលមិនត្រូវបានជ្រើសរើសចូលក្នុងជួរកងទ័ពវិញ ក៏បានទទួលការអប់រំ បណ្តុះបណ្តាល មានវិន័យ និងក្លាយជាធនធានមនុស្សល្អសម្រាប់សង្គមជាតិ។
ក្នុងឱកាសនោះ សម្តេច ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងយ៉ាងដូច្នេះថា៖ «កិច្ចការពារជាតិ មិនមែនជាភារកិច្ចតែរាជរដ្ឋាភិបាលតែម្នាក់ឯងនោះទេ តែកិច្ចការនេះពិតជាទាមទារដាច់ខាតពីការចូលរួមចំណែកគ្រប់ភាគី និងគ្រប់កោសិកា តាំងពីវិស័យឯកជន និងប្រជាពលរដ្ឋគ្រប់រូប ដោយប្រកបស្មារតីស្នេហាជាតិខ្ពស់ ចំពោះកងទ័ព»។
ដោយ៖ សិលា
