រុស្ស៊ីរិះគន់បារាំង-អង់គ្លេស ថាធ្វើនយោបាយយកមុខមាត់ជាងដោះស្រាយបញ្ហាពិតប្រាកដ

រុស្ស៊ីបានចេញមុខរិះគន់យ៉ាងខ្លាំងក្លាចំពោះគំនិតផ្ដួចផ្ដើមរបស់បារាំង និងអង់គ្លេស ក្នុងការបង្កើតបេសកកម្មចម្រុះជាតិសាសន៍ដើម្បីការពារសេរីភាពនៃការធ្វើដំណើរតាមកប៉ាល់ក្នុងច្រកសមុទ្រហ័រមូស។

លោកស្រី Maria Zakharova អ្នកនាំពាក្យក្រសួងការបរទេសរុស្ស៊ី បានអះអាងកាលពីថ្ងៃព្រហស្បតិ៍ទី១៦ ខែមេសា ឆ្នាំ២០២៦ ថាគម្រោងនេះមិនអាចទៅរួចឡើយ ដោយសាររដ្ឋាភិបាលប៉ារីសមិនបានព្យាយាមពិភាក្សាជាមួយភាគីដែលកំពុងវាយតប់គ្នា ជាពិសេសប្រទេសអ៊ីរ៉ង់។

ក្នុងសន្និសីទកាសែតនៅទីក្រុងមូស្គូ លោកស្រី Zakharova បានចោទប្រកាន់បារាំងថា កំពុងធ្វើនយោបាយយកមុខមាត់ និងសម្ដែងឲ្យពិភពលោកឃើញថាខ្លួននៅតែមានឥទ្ធិពលក្នុងឆាកអន្តរជាតិ ខណៈដែលតាមពិតបារាំងបានបាត់បង់អំណាចនេះជាច្រើនឆ្នាំមកហើយ។

ការរិះគន់នេះកើតឡើងស្របពេលដែលប្រធានាធិបតីបារាំងលោក Emmanuel Macron និងនាយករដ្ឋមន្ត្រីអង់គ្លេសលោក Keir Starmer ត្រៀមខ្លួនធ្វើជាសហប្រធានក្នុងសន្និសីទនៅទីក្រុងប៉ារីសនាថ្ងៃសុក្រនេះ។

ស្ថានការណ៍កាន់តែស្មុគស្មាញបន្ទាប់ពីការចរចារវាងអាមេរិក និងអ៊ីរ៉ង់នៅប៉ាគីស្ថានមិនបានជោគជ័យ ដែលឈានដល់ការដែលអាមេរិកសម្រេចចិត្តបិទផ្លូវទឹកនៅច្រកសមុទ្រហ័រមូសតាំងពីថ្ងៃចន្ទមកម្ល៉េះ។