ទឹកភ្នែករីករាយ! ភ្ញៀវជាតិ-អន្តរជាតិជិត ១.៤ លាននាក់ បំពេញភ្នំពេញក្នុងពិធីនគរសង្ក្រាន្ត បន្ទាប់ពីបុណ្យចូលឆ្នាំខ្មែរ

ភ្នំពេញ៖ សម្លេងសើចរីករាយ និងភាពកុះករនៃប្រជាពលរដ្ឋបានបំពេញរាជធានីភ្នំពេញ នៅពេលដែលព្រឹត្តិការណ៍«នគរសង្ក្រាន្ត»បានទាក់ទាញភ្ញៀវជាតិ និងអន្តរជាតិជាង ១,៣៨៤,៥១១ នាក់ ក្នុងរយៈពេលតែ ៤ ថ្ងៃប៉ុណ្ណោះ។

លោកស្រី ដោ សម្ផស្ស នាយិការរង និងជាអ្នកនាំពាក្យសាលារាជធានីភ្នំពេញ បានបញ្ជាក់នៅថ្ងៃទី១៨ មេសា ២០២៦ ថា៖ «នៅថ្ងៃទី៤ នៃព្រឹត្តិការណ៍នគរសង្ក្រាន្ត យើងទទួលបានភ្ញៀវសរុប ១,៣៨៤,៥១១ នាក់ ដែលក្នុងនោះមានប្រជាពលរដ្ឋកម្ពុជា ១,៣៧៤,៧២០ នាក់ និងទេសចរបរទេស ៩,៧៩១ នាក់»។

ជាក់ស្តែង ក្នុងរយៈពេល ៣ ថ្ងៃនៃបុណ្យចូលឆ្នាំខ្មែរ ឆ្នាំមមី អដ្ឋស័ក ព.ស២៥៧០ (គ.ស២០២៦) និងព្រឹត្តិការណ៍នគរសង្ក្រាន្ត បានទាក់ទាញភ្ញៀវសរុបជាង ៤,៣ លាននាក់ ដែលបំពេញទីក្រុងដោយសម្លេងសើចរីករាយ និងសាមគ្គីភាពក្រោមម្លប់សន្តិភាព។

លោកស្រីបានបញ្ជាក់បន្ថែមថា៖ «នៅថ្ងៃទី១ មានភ្ញៀវ ៩៨៣,០៨០ នាក់ (ទេសចរ ៧,០៦៨ នាក់) ថ្ងៃទី២ មាន ១,៥៦៥,៣៦៧ នាក់ (ទេសចរ ១៧,៩៤០ នាក់) និងថ្ងៃទី៣ មាន ១,៨២៧,៩៩០ នាក់។ សុខសុវត្ថិភាពមានភាពល្អប្រសើរ គ្មានហេតុការណ៍ធំដុំកើតឡើងឡើយ»។

ព្រឹត្តិការណ៍នគរសង្ក្រាន្តឆ្នាំ២០២៦ ត្រូវបានរៀបចំរយៈពេល ៦ ថ្ងៃ (១៤-១៩ មេសា) ដោយសហភាពសហព័ន្ធយុវជនកម្ពុជា និងរដ្ឋបាលរាជធានីភ្នំពេញ។ គិតមកដល់ថ្ងៃទី១៨ មេសា ព្រឹត្តិការណ៍បានឈានដល់ថ្ងៃទី៥ ហើយនៅសល់តែថ្ងៃសៅរ៍ និងអាទិត្យប៉ុណ្ណោះ។

«សូមអញ្ជើញបងប្អូនប្រជាពលរដ្ឋបន្តមកលេងកម្សាន្តឱ្យបានច្រើនកុះករបន្ថែមទៀត» លោកស្រីបានអំពាវនាវ។

ព្រឹត្តិការណ៍នេះបង្ហាញពីភាពរស់រវើកនៃវប្បធម៌ខ្មែរ និងសក្តានុពលទេសចរណ៍របស់ប្រទេសកម្ពុជា ដែលអាចទាក់ទាញទេសចរបរទេសរាប់ពាន់នាក់មកចូលរួមក្នុងពិធីបុណ្យប្រពៃណី។

ការចូលរួមយ៉ាងកុះករនេះបង្ហាញពីការត្រឡប់មករកភាពធម្មជាតិនៃការប្រារព្ធពិធីបុណ្យប្រពៃណីបន្ទាប់ពីពេលវេលានៃការរឹតត្បិតដោយសារជំងឺកូវីដ-១៩។

ដោយ៖ សំរិត