By រាជធានីភ្នំពេញ៖ ភ្លើងបានឆេះឃ្លាំងមួយកន្លែងនៅសង្កាត់ព្រែកលៀប យប់មិញ បណ្តាលឲ្យផ្ទះមួយខ្នងទៀតនៅជិតខាងត្រូវឆេះរាលដាលដែរ។
ហេតុការណ៍នេះបានកើតឡើងនៅម៉ោង ៩:៥០យប់ ថ្ងៃទី១៨ ខែមេសា ឆ្នាំ២០២៦ នៅផ្លូវបេតុង ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
លោកវរសេនីយ៍ឯក ព្រហ្ម យ៉ន នាយការិយាល័យ បានដឹកនាំបញ្ជាផ្ទាល់ដល់កងកម្លាំងសមត្ថកិច្ចជំនាញ ឲ្យចេញជួយអន្តរាគមន៍បាញ់ទឹកពន្លត់ឲ្យទាន់ពេលវេលា ដើម្បីការពារកុំឲ្យភ្លើងឆេះរាលដាលទៅរថយន្តដែលនៅក្បែរនោះ។
ក្នុងប្រតិបត្តិការនេះ កម្លាំងសមត្ថកិច្ចជំនាញបានប្រើប្រាស់រថយន្តពន្លត់អគ្គិភ័យចំនួន០៨គ្រឿងទៅអន្តរាគមន៍បាញ់ពន្លត់ ហើយភ្លើងបានរលត់ទៅវិញនៅម៉ោង១០:៣០យប់ថ្ងៃដដែល។
តាមនគរបាលការិយាល័យបង្ការពន្លត់អគ្គីភ័យនិងសង្គ្រោះនៃស្នងការនគរបាលរាជធានីភ្នំពេញបានឲ្យដឹងថា សំណង់ដែកប្រក់ស័ង្កសីទំហំ៨ម៉ែត្រ គុណ៤០ម៉ែត្រ ត្រូវភ្លើងឆេះរងការខូចខាត បន្ទប់ចំនួន១ទំហំ៦ម៉ែត្រគុណ៨ម៉ែត្រ រួមមានម៉ាស៊ីនត្រជាក់ ពូក កង្ហា និងសម្ភារៈប្រើប្រាស់ផ្សេងៗ។
ភ្លើងបានរាលដាលទៅផ្ទះមួយខ្នងទៀតនៅជិតខាង ទំហំ៤ម៉ែត្រគុណ៤ម៉ែត្រ ដែលរងការខូចខាតសម្ភារៈរួមមានទូកទឹកកក ម៉ាស៊ីនបោកខោអាវ ពូក ព្រមទាំងសម្ភារៈចាប់ហួយមួយចំនួន។
តាមនគរបាលបានឲ្យដឹងទៀតថា ហេតុការណ៍គ្រោះអគ្គិភ័យនេះ កម្លាំងសមត្ថកិច្ចជំនាញបានធ្វើការស្រាវជ្រាវរកឃើញថា គឺបណ្តាលមកពីការឆ្លងចរន្តអគ្គិសនីបង្កជាអគ្គិភ័យ។
