ជនសង្ស័យលួចរថយន្តពីភ្នំពេញ រត់ទៅខេត្តក្រចេះត្រូវចាប់ខ្លួនបាន

ភ្នំពេញ៖ កម្លាំងនគរបាលបានចាប់ខ្លួនជនសង្ស័យម្នាក់ដែលលួចរថយន្តពីរាជធានីភ្នំពេញ ហើយរត់ទៅលាក់ខ្លួននៅខេត្តក្រចេះ។

ព្រឹត្តិការណ៍នេះកើតឡើងនៅថ្ងៃទី១៨ ខែមេសា ឆ្នាំ២០២៦ នៅវេលាម៉ោង២១:០០នាទីយប់ នៅភូមិកណ្តាល ឃុំឆ្លូង ស្រុកឆ្លូង ខេត្តក្រចេះ។ កម្លាំងអធិការដ្ឋាននគរបាលខណ្ឌទួលគោក បានសហការជាមួយកម្លាំងនគរបាលស្រុកឆ្លូង ចាប់ខ្លួនជនសង្ស័យម្នាក់ពីបទលួចរថយន្ត។

រថយន្តដែលត្រូវលួចគឺម៉ាក TOYOTA PRIUS ពណ៌ប្រផេះ ស៊េរីឆ្នាំ២០០៧ ដែលត្រូវបានលួចនៅមុខផ្ទះលេខ៣២AE0 ផ្លូវលេខ១១០ សង្កាត់ផ្សារដេប៉ូទី៣ ខណ្ឌទួលគោក កាលពីថ្ងៃទី១២ ខែមេសា វេលាម៉ោង០១:២៥នាទីយប់។

ជនសង្ស័យឈ្មោះ មាស សំណាក់ ហៅ ណាក់ ភេទប្រុស អាយុ៣៦ឆ្នាំ ជនជាតិខ្មែរ។ រថយន្តដែលត្រូវលួចមានលេខម៉ាស៊ីន 1NZ4337956 និងលេខតួ JTDKB20U073214450។

ជនរងគ្រោះឈ្មោះ ថុល រ៉ាឌី ភេទប្រុស អាយុ៤២ឆ្នាំ ជាជាងជួសជុលរថយន្ត ស្នាក់នៅផ្ទះលេខ៣២AE0 ផ្លូវលេខ១១០ ខណ្ឌទួលគោក។

បច្ចុប្បន្ន ជនសង្ស័យកំពុងត្រូវឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរនិងចាត់ការតាមនីតិវិធី។