By ភ្នំពេញ៖ រាជរដ្ឋាភិបាលកម្ពុជាបានចេញសេចក្តីប្រកាសព័ត៌មានយ៉ាងខ្លាំងក្លា កាលពីថ្ងៃទី១៩ ខែមេសា ឆ្នាំ២០២៦ ដើម្បីតវ៉ាប្រឆាំងសកម្មភាពរបស់កងកម្លាំងប្រដាប់អាវុធថៃ ដែលបន្តពង្រឹងការកាន់កាប់ខុសច្បាប់នៅតាមព្រំដែនកម្ពុជា-ថៃ។
ក្រសួងការបរទេស និងសហប្រតិបត្តិការអន្តរជាតិបានចេញសេចក្តីប្រកាសជាផ្លូវការ ដោយចង្អុលបង្ហាញថា កងកម្លាំងប្រដាប់អាវុធថៃបានធ្វើសកម្មភាពរំលោភលើអធិបតេយ្យ និងបូរណភាពទឹកដីរបស់កម្ពុជានៅទីតាំងជាច្រើន។
ក្នុងខេត្តព្រះវិហារ នៅឃុំស្រអែម ស្រុកជាំក្សាន្ដ កងកម្លាំងថៃបានសាងសង់ប៉ុស្តិ៍យាមសង្កេតការណ៍នៅតំបន់តាថាវ ដែលស្ថិតនៅចន្លោះប្រាសាទព្រះវិហារ និងតំបន់៥មករា។
នៅខេត្តឧត្តរមានជ័យ កងកម្លាំងថៃបានធ្វើសកម្មភាពជាច្រើន៖
– ស្រុកអន្លង់វែង៖ សាងសង់ផ្លូវជិតបង្គោលព្រំដែនលេខ២
– ស្រុកបន្ទាយអំពិល៖ ជីកលេណដ្ឋាននៅច្រកទ្វារអន្តរជាតិជប់គគីរ
– សង្កាត់កូនក្រៀល៖ សាងសង់ប៉ុស្តិ៍យាម និងឈូសឆាយដី
– តំបន់ថ្មដូន៖ សាងសង់ផ្លូវថ្មើរជើង និងលេណដ្ឋាន
នៅខេត្តពោធិ៍សាត់ កងកម្លាំងថៃបានប្រើប្រាស់គ្រឿងចក្រធុនធ្ងន់ដើម្បីឈូសឆាយដីបន្ថែមនៅតំបន់អូរភ្លុកដំរី។
សកម្មភាពទាំងនេះត្រូវបានចាត់ទុកថាជាការរំលោភលើការប្តេជ្ញាចិត្តរបស់ប្រទេសថៃផ្ទាល់ ក្រោមធម្មនុញ្ញអង្គការសហប្រជាជាតិ និងសន្ធិសញ្ញាអាស៊ាន។
រាជរដ្ឋាភិបាលកម្ពុជាបានគូសបញ្ជាក់យ៉ាងច្បាស់ថា កម្ពុជាមិនទទួលយកការទាមទារទឹកដីណាមួយដែលអះអាងដោយឯកតោភាគីពីថៃឡើយ។ កម្ពុជាបានអំពាវនាវឱ្យថៃបញ្ឈប់រាល់សកម្មភាពឯកតោភាគីទាំងអស់ ដើម្បីរក្សាសន្តិភាព ស្ថិរភាព និងភាពជាអ្នកជិតខាងល្អតាមបណ្តោយព្រំដែន។
កម្ពុជានៅតែប្តេជ្ញាចិត្តយ៉ាងខ្ជាប់ខ្ជួនក្នុងការស្វែងរកដំណោះស្រាយជម្លោះព្រំដែនទាំងអស់ជាមួយថៃតាមរយៈវិធីសន្តិវិធី ស្របតាមច្បាប់អន្តរជាតិ។
ដោយ៖ តារា
