By បន្ទាយមានជ័យ៖ ក្រោមទឹកចិត្តគិតគូរ និងយកចិត្តទុកដាក់ខ្ពស់លើជីវភាពរស់នៅរបស់ប្រជាពលរដ្ឋ លោក រ័ត្ឋ ដាស៊ីណង់ អភិបាលស្រុកមង្គលបូរី ខេត្តបន្ទាយមានជ័យ បានដឹកនាំក្រុមការងារចុះជួបសំណេះសំណាល និងនាំយកអំណោយស្បៀងអាហារសរុបចំនួន ១២តោន មកចែកជូនដល់បងប្អូនប្រជាពលរដ្ឋដែលមានជីវភាពខ្វះខាតចំនួន ៦០០គ្រួសារ មកពីតាមមូលដ្ឋាននានាក្នុងស្រុក កាលពីថ្ងៃទី១៨ ខែឧសភា ឆ្នាំ២០២៦។
លោក រ័ត្ឋ ដាស៊ីណង់ អភិបាលស្រុក បានបញ្ជាក់ថា ទោះស្ថិតក្នុងកាលៈទេសៈណាក៏ដោយ រាជរដ្ឋាភិបាល និងអាជ្ញាធរ គឺមិនទុកឱ្យនរណាម្នាក់ស្លាប់ដោយអត់អាហារ ឬរងគ្រោះដោយគ្មានការជួយជ្រោមជ្រែងឡើយ។ ក្រៅពីការផ្តល់ជំនួយឧបត្ថម្ភ លោកអភិបាលស្រុកក៏បានសង្កត់ធ្ងន់លើបញ្ហាសុវត្ថិភាព និងសុខភាពសាធារណៈ ក្នុងអំឡុងពេលដែលអាកាសធាតុមានការប្រែប្រួលខ្លាំង ដោយបានផ្ដល់អនុសាសន៍សំខាន់ៗដល់ពលរដ្ឋ រួមមាន៖ ត្រូវតាមដានព័ត៌មានអាកាសធាតុជាប្រចាំ ដើម្បីត្រៀមទប់ទល់នឹងបាតុភូតធម្មជាតិ។ នៅពេលមានភ្លៀងធ្លាក់លាយឡំផ្គររន្ទះ និងខ្យល់កន្ត្រាក់ ត្រូវប្រញាប់ស្វែងរកទីកន្លែងមានសុវត្ថិភាព និងកាត់ផ្ដាច់ប្រព័ន្ធអគ្គិសនីក្នុងផ្ទះ បើចាំបាច់ ដើម្បីបង្ការគ្រោះថ្នាក់។ ត្រូវយកចិត្តទុកដាក់លើការរស់នៅស្អាត ហូបស្អាត និងផឹកស្អាត ដើម្បីបង្ការជំងឺដង្កាត់ផ្សេងៗ។
លោកអភិបាលស្រុកក៏បានជំរុញ និងលើកទឹកចិត្តដល់ពលរដ្ឋឱ្យបន្តយកចិត្តទុកដាក់លើការងារបង្កបង្កើនផល តាមរយៈការដាំដុះស្រូវ បន្លែបង្ការ ការចិញ្ចឹមត្រី និងសត្វ ព្រមទាំងប្រកបមុខរបរផ្សេងៗទៀតឱ្យអស់លទ្ធភាព ដើម្បីជួយទ្រទ្រង់ និងលើកកម្ពស់ជីវភាពគ្រួសារឱ្យកាន់តែប្រសើរ និងមាននិរន្តរភាព។
ឆ្លើយតបនឹងកាយវិការមនុស្សធម៌ដ៏ទាន់ពេលវេលានេះ ប្រជាពលរដ្ឋដែលបានទទួលអំណោយបានសម្តែងនូវក្តីរំភើបឥតឧបមា។ លោកយាយ ហ៊ាន សារឿន អាយុ ៦៨ឆ្នាំ ដែលជាចាស់ជរាគ្មានទីពឹងម្នាក់ក្នុងស្រុកមង្គលបូរី បានរៀបរាប់ទាំងរំភើបថា៖ «ខ្ញុំពិតជាត្រេកអរខ្លាំងណាស់ កន្លងមកគ្រួសារខ្ញុំខ្វះខាតមែនទែន ពេលខ្លះបារម្ភរឿងអត់អង្ករដាំបាយ។ ថ្ងៃនេះបានលោកអភិបាលស្រុកយកអង្ករមកជួយដល់ដៃ បែបនេះធ្វើឱ្យខ្ញុំកក់ក្តៅចិត្តណាស់ ដឹងថាអាជ្ញាធរមិនបោះបង់ពួកខ្ញុំចោលឡើយ។ ខ្ញុំសូមជូនពរឱ្យថ្នាក់ដឹកនាំទាំងអស់មានសុខភាពល្អ និងជោគជ័យគ្រប់ភារកិច្ច»។
ប្រជាពលរដ្ឋដទៃទៀតក៏បានលើកឡើងដែរថា ក្រៅពីបានអង្ករហូប អ្នកភូមិពិតជាសប្បាយចិត្តដែលបានស្តាប់ការណែនាំរបស់លោកអភិបាលស្រុក ហើយបានប្តេជ្ញាថា នឹងនាំយកការណែនាំរឿងដាំដុះ និងចិញ្ចឹមសត្វទៅអនុវត្តតាម ដើម្បីឱ្យគ្រួសារមានចំណូលបន្ថែម មិនពឹងផ្អែកតែលើជំនួយតែមួយមុខឡើយ។
ជំនួយស្បៀងអង្ករទាំង ១២តោននេះ មិនត្រឹមតែបានជួយបំពេញក្រពះរបស់ពលរដ្ឋបានមួយគ្រាប៉ុណ្ណោះទេ ប៉ុន្តែវាបានស្តែងឱ្យឃើញនូវសាមគ្គីភាព និងការយកចិត្តទុកដាក់យ៉ាងពិតប្រាកដពីសំណាក់រាជរដ្ឋាភិបាលមកលើប្រជាពលរដ្ឋនៅតាមមូលដ្ឋាន៕
ដោយ សំរិត
