By ភ្នំពេញ – កូរ៉េខាងជើងបានបន្តការបាញ់សាកល្បងមីស៊ីលបាលិស្ទីគយ៉ាងសកម្ម ដោយមេដឹកនាំគីម ជុងអ៊ុន និងកូនស្រីរបស់លោកបានចុះត្រួតពិនិត្យការបាញ់មីស៊ីលយុទ្ធសាស្ត្រ Hwasong-11LA កាលពីថ្ងៃអាទិត្យ។
តាមរបាយការណ៍ពីអាជ្ញាធរកូរ៉េខាងជើង KCNA ការបាញ់សាកល្បងនេះជាលើកទី៤ ក្នុងខែមេសា និងជាលើកទី៧ ក្នុងឆ្នាំ២០២៦។ ការធ្វើតេស្តនេះធ្វើឡើងដើម្បីវាយតម្លៃសមត្ថភាពក្បាលគ្រាប់ដែលបំពាក់គ្រាប់បែកចង្កោម។
មីស៊ីល Hwasong-11LA ជាប្រភេទមីស៊ីលបាលិស្ទីគតាក់ទិកដែលបាញ់ចេញពីផ្ទៃដី ដោយកូរ៉េខាងជើងបានបាញ់សាកល្បងចំនួន៥គ្រាប់ក្នុងការធ្វើតេស្តនេះ។
យោធាកូរ៉េខាងត្បូងបានឱ្យដឹងថា ការបាញ់សាកល្បងបានធ្វើឡើងនៅក្បែរទីក្រុង Sinpo នៅវេលាម៉ោង ៦:១០នាទីព្រឹក។ រដ្ឋាភិបាលជប៉ុនបានបញ្ជាក់ថា មីស៊ីលទាំងនោះបានធ្លាក់នៅក្បែរឆ្នេរភាគខាងកើតឧបទ្វីបកូរ៉េ ដោយមិនបានចូលក្នុងតំបន់សេដ្ឋកិច្ចផ្តាច់មុខរបស់ជប៉ុនទេ។
ការបាញ់សាកល្បងមីស៊ីលដ៏សកម្មនេះកើតឡើងក្នុងពេលដែលកូរ៉េខាងជើងកំពុងពង្រឹងសមត្ថភាពមីស៊ីល និងអាវុធនុយក្លេអ៊ែររបស់ខ្លួន ទៅផ្ទុយនឹងការហាមឃាត់របស់ក្រុមប្រឹក្សាសន្តិសុខអង្គការសហប្រជាជាតិ។
KCNA បានបោះពុម្ពរូបថតបង្ហាញពីលោក គីម ជុងអ៊ុន និងកូនស្រីឈ្មោះ Ju Ae កំពុងពិនិត្យមើលការបាញ់មីស៊ីល ដោយមានមន្ត្រីយោធាជាច្រើននាក់អមដែរ។
